LEICESTER CITY V MANCHESTER UNITED EWembley Stadium, e-England
Kusasa ngo 4.45pm
Ku-SS3
UJOSE Mourinho usethubeni elihle lokuwina izinhliziyo zabalandeli beManchester United uma enganqoba isicoco sakhe sokuqala njengomqeqeshi waleli qembu lase-Old Trafford kwazise izotholana phezulu nompetha be-English Premier League, iLeicester City kwiFA Community Shield kusasa.
Kulo mdlalo wokubhulela amazolo isizini entsha yebhola lase-England, lapho iqembu eliwine iPremier League lizwana amandla nelinqobe iFA Cup ngesizini edlule, i-United izobhekana nezika-Claudio Ranieri ezigile izimanga ngesizini edlule zinqoba isicoco sazo sokuqala seligi.
Ama-Red Devils adlule nesicoco seFA Cup ngokwehlula iCrystal Palace esalolongwa wuqweqwe lomqeqeshi waseNetherlands uLouis Van Gaal, odede indawo kwathatha uMourinho wasePortugal nodume ngelika “The Special One”.
UMourinho uchithe izinyanga ezinhlanu ezikhotha amanxeba ngemuva kokukhonjwa indlela yisiqumama sesikhulu seChelsea uRoman Abramovich ngoDisemba ngemuva kwemiphumela engagculisi yeqembu laseLondon ekubeni bekulindelwe livikele isicoco seligi.
URanieri yena uhlalelwe yingcindezi neqembu lakhe ebelidume ngokuvika izembe phambilini. Kuyimanje uRanieri ulwela ukugcina ezifana noRiyaad Mahrez wase-Algeria ofunwa uthuli yi-Arsenal noDanny Drinkwater. Usevele usehambile uN’Golo Kante wajoyina iChelsea ngo-£32 million ngoJulayi.
“Iqembu lisebenza ngokuzikhandla, ngicabanga ukuthi abadlali bafuna ukuqhubeka neqembu bazame ukwenza okukhulu kunangesizini edlule,” kuchaza uRanieri exoxa nephephandaba lase-England i Daily Mail.
“Siyazi kuzoba nzima kodwa siyilambele impumelelo. Kubalulekile ukuthi basayine izinkontileka ezintsha, bahlale nathi ukuze bathole amava okudlala kuChampions League,” kuqhuba uRanieri.
Yize noma abanye abalandeli bethatha iCommunity Shield njengomdlalo wokuzicija noma wobungani ngaphambi kokuqala kwesizini entsha kodwa ingumqhudelwano ohlonishwayo e-England, kwasize ubalwa njengesinye sezicoco ezihloniphekile ebholeni lakuleliya lizwe.
Umbango phakathi kukaMourinho noRanieri mdala kwazise kuzokhumbuleka ukuthi lo mqeqeshi wasePortugal wathatha isikhundla salo mqeqeshi wase-Italy ngo-2004. URanieri wayekade ephume indawo yesibili ngesikhathi elolonga iChelsea eyashiywa i-Arsenal okuyiyona eyagcina ikhale yemuka nesicoco se-Premier League ingayazi induku ngamaphuzu angama-90. I-Chelsea kaRanieri yaqoqa amaphuzu angu-79.
Muva nje uMourinho uke wabiza uRanieri ngesehluleki somqeqeshi.
“Ngo-2004 ngesikhathi ngifika ku-Chelsea ngibuza izikhulu ukuthi kungani ngithathe isikhundla sikaRanieri, ngatshelwa ukuthi yingoba iqembu selifuna ukuwina izicoco, kanti futhi babengakholwa ukuthi kungenzeka lokhu becijwa nguye,” kusho uMourinho owayekhuluma ne Daily Mail.
Waqhuba wathi: “Akusiyona inkinga yami ukuthi ubukeka njengesahluleki kuChelsea.”
URanieri waziphendulela kule nkulumo kaMourinho ngokuhlithwa isicoco sePremier League esasikade siphakanyiswe ngu-The Special One ngo-2014/15.
Kubhekwe lukhulu kuMourinho, ngemuva kokuba uDavid Moyes owalandela ingqalabutho u-Sir Alex Ferguson kanye noVan Gaal beshaye udaka kuleli qembu eselisizwa ngendaba isicoco seligi. I-United igcine ukusiwina kushiya uFerguson ngo-2013. Landela ikhasi lethu leDiski Yomhlaba kwiFacebook usebenzise #BOB1617(Battle of the bosses 2016-17) @IsolezweNewspaper. Noma usubuka lo mdlalo usazise uwubukaphi nobani ngokusebenzisa yona i #BOB1617. n Khonamanjalo, izolo kusabalele imibiko ethi iReal Madrid isivumelene noCristiano Ronaldo ukuba ahlale kuyo aze aqede ukudlal ibhola elisezingeni eliphezulu. Izolo imithombo yabezindaba yaphesheya ibingagcini ngokubika ngokuphoxwa kukaNeymar weBarcelona wu-Itumeleng Khune kuma-Olympic Games aseRio kodwa ibishintshana nangodaba lokuvuka kweGalaticos kwazise uRonaldo kuthiwa sekusele asayine isibophezelo sokuhlala eMadrid kuze kushaye u-2020 noma u-2021. Uyobe esena-35 noma-36 Lokho kuhambisana nokuthi uGareth Bale naye azibophezele.