‘Singaba nobungozi isenzo seCope’
ABAHOLI beCope uMnuz Mosiuoa Lekota noMnuz Mbazima Shilowa, abangamalungu ePhalamende, iqembu labo lithathe isinqumo sokuba bangalubhadi khona ngoba lisola i-ANC ngokungavumi ukukhipha uMengameli Jacob Zuma esikhundleni. ISITHOMBE: BOXER NGWENYA ABAHOLI beCope uMnuz Mosiuoa Lekota noMnuz Mbazima Shilowa, abangamalungu ePhalamende, iqembu labo lithathe isinqumo sokuba bangalubhadi khona ngoba lisola i-ANC ngokungavumi ukukhipha uMengameli Jacob Zuma esikhundleni. ISITHOMBE: BOXER NGWENYA
CELANI SIKHAKHANE
S IBONAKALA sizoba yingozi ePhalamende isinqumo seCongress of the People (Cope), sokuduba izinhlelo zePhalamende uma amanye amaqembu aphikisayo ehambisana nayo.
Lokhu kuvezwe ngabahlaziyi bezepolitiki ngemuva kokuthi leli qembu lithathe isinqumo sokuthi akukho noyedwa umholi walo osePhalamende ozobonakala ezihlanganisa nezinhlelo zalesi sakhiwo.
ICope ihoxe ezinhlelweni zePhalamende ngoba ithi iqembu elibusayo likhombise ukudelela isinqumo seNkantolo yoMthethosisekelo ngokuphikisana nesiphakamiso sokukhipha uMengameli Jacob Zuma esikhundleni.
Leli qembu lithi lizoduba zonke izinhlelo zePhalamende kuze kube kutholakala isixazululo kuyo iNkantolo yoMthethosisekelo.
Umhlaziyi wezepolitiki, uMnuz Sanele Nene, uthe kungaba nobungozi uma amanye amaqembu aphikisayo engaduba iPhalamende njengeCope..
“ICope iyiqembu elincane kangangokuthi noma ngabe yini eliyenzayo kayizwakali ngenxa yobuncane balo nasePhalamende. Ngakho lesi sinqumo sabo awukho umehluko esizowenza ngokusebenza kwePhalamende kodwa uma amanye amaqembu aphikisayo nawo enquma ukujoyina iCope kuzoba nengozi. Lokho kuzosho ukuthi sekuyinhlangano eyodwa esePhalamende okuyi-ANC ezobhekana nesimo sokuba ishaye imithetho ingaphikiswa muntu. Empeleni lokho sekuyosho ukuthi sekumele kubhekisiswe imithetho yePhalamende indlela esebenza ngayo,” kusho uNene.
UMnuz Xolani Dube wesikhungo sokucobelelana ngolwazi, iXubera, uvumelane noNene wathi kuzoba nzima ukuba iPhalamende lisebenze uma amanye amaqembu engagcina ejoyina iCope.
“Empeleni iCope nakuba incane kodwa umholi wayo uMosiuoa Lekota usakhuluma kuzwakale ngenxa yomlando wakhe ohlonishwayo emzabalazweni naku-ANC. Ngakho ngibona nakulokhu kuzoba khona ukuthinteka kokusebenza kwePhalamende, ikakhulukazi uma kuzogcina kungena namanye amaqembu eduba iPhalamende ngoba kuyosho ukuthi alikwazi ukusebenza ngenhlangano eyodwa. Kungasho nokuthi kumele kubuyelwe emuva emithethweni elawula ukusebenza kwalo iPhalamende mayelana nalesi sinqumo ngoba kuyaqala ukuthi kwenzeke,” kusho uDube.
ICope ikhala nangokuthi indaba kaZuma isidale uqhekeko ngisho emabandleni ngoba kukhona abafundisi abaphumele obala bethi uZuma akasule, kanti sekukhona abathi asikho isidingo ngoba usexolisile kodwa akushushiswe abamhlomekisa ngodaba lwaseNkandla.
Omunye womakadebona be-ANC, uMnuz Mavuso Msimang, uthe kunzima ukutshela uZuma ukuthi akehle esikhundleni ngoba amalungu esigungu sakhe ayamsaba, esho nokuthi naye uyamsaba ngoba uyamazi kodwa ubona kufanele ehle.