Akalilahlile ithemba ngeCaf uSteve
Dejected Kaizer Chiefs players during the Premiership match between Kaizer Chiefs and Jomo Cosmos on 15 March 2016 at FNB Stadium Pic Sydney Mahlangu/ BackpagePix Dejected Kaizer Chiefs players during the Premiership match between Kaizer Chiefs and Jomo Cosmos on 15 March 2016 at FNB Stadium Pic Sydney Mahlangu/ BackpagePix
MBONGISENI BUTHELEZI
EseGoli
K UNGENZEKA ukuthi kukhona abangasayibali iKaizer Chiefs njengelinye lamaqembu azohamba ibanga elide kuCaf Champions League ngenxa yokuphenduka ukudla kwenduku kulezi zinsuku, kodwa umqeqeshi wayo uSteve “Mphathi” Komphela akakaliphonsi ithawula.
NgeSonto, iChiefs izodlala ekuhambeni neqembu lase-Ivory Coast, i-Asec Mimosas emdlalweni womlenze wesibili ozoqala ngo-5.30 ntambama ngokwesikhathi sakuleli. Iya kulo mdlalo ilandela ngemuva ngo 1-0 kulandela ukwehlulelwa ekhaya ngempelasonto edlule.
Ngemuva kokuthi iqembu lakhe liphinde lathola enye induku ka 1-0, liguqiswa yiJomo Cosmos kowe-Absa Premiership eFNB Stadium ngoLwesibili ebusuku, uKomphela utshele abezindaba ukuthi ubona ezakhe zingakwazi ukufika e-Ivory Coast ziphendule amatafula.
Ebuzwa ukuthi ngabe basangakwazi ukugwema inhlekelele abangase babhekane nayo yokuphuma ekuseni kulo mqhudelwano, uthe: “Yebo ngicabanga ukuthi sisengabuya. Sidlalile nabo ekhaya sesiyabazi. E-Abidjan sizolwela ukuthi sithole igoli kuqala. Lokhu kuzobaphoqa ukuthi nabo bafune elabo,” usho kanje.
Lo mqeqeshi ukhuluma ngokuthola igoli nje, usho into esingabakhwekazi kubona njengoba kuyona yonke imidlalo emine edlule asebehlulwe kuyona bengazange bakwazi nokushaya elokubika. Uma iChiefs inqoba lapha izodlala neqembu laseLibya i-Al Ahli noma i-Al Hilal yaseSudan. Lona kuzobe sekuwumzuliswano wokugcina wokuhlunga amaqembu azongena kweyamaqoqo.
UKomphela uthe ngeke akuthathe njengokwehla komthwalo ukuyodlalela ekuhambeni ngaphandle kwabalandeli bezakhe abangasamfuni. Ingcosana yabalandeli abebehambele umdlalo weCosmos eFNB Stadium iqhubekile nokuveza ukuthi uKomphela kumele ahambe. “Siyinto eyodwa nabo (abalandeli). Besingathanda ukuthi sidlale bekhona, sibanikeze umphumela omuhle abawufunayo,” kusho uKomphela.
“Ngeke uzivikele kubalandeli ngokuthi udlala kahle, bona bafuna umphumela omuhle kuphela.”
Ngesizini edlule iChiefs ikhishwe yiqembu laseMorocco, iRaja Casablanca, kuCaf Champions League. IMamelodi Sundowns izovakashela i-AC Leopards eCongo koweChampionship ihamba phambili ngo 2-0. IBidvest Wits edlala kuCaf Confederation yona iya eTanzania ku-Azam FC ilandela ngemuva ngo 3-0. I-Ajax ikhishiwe kulo mqhudelwano.