Akanangcindezi ngombango wejezi u-Amla

MINENHLE MKHIZE

A YIMKHATHAZI indaba yombango wejezi kumaProteas uHashim Amla olwela ukuvula emidlalweni yeT20.

AmaProteas asanda kuqunjwa phansi yi-Australia ngo 2-1 emidlalweni emithathu yokuchungechunge yeT20 azoqala umshikashika wokuzama ukunqoba iNdebe yoMhlaba okokuqala emlandweni wekhilikithi eNingizimu Afrika kusasa uma esedudulana ne-England emdlalweni wokuqala kulo mqhudelwano ose-India.

Ngaphambi kokuthi amaProteas adlale ne-England adlale imidlalo emibili yesihle neqembu lesizwe lase-India neqembu elidlala kwiligi yase-India. Kuze kube yimanje akucaci ukuthi yibaphi abadlali ababili abazovula kumaProteas.

Abadlali ababanga indawo yokuvula ngu-Amla, Quinton de Kock no-AB de Villiers. Ngesikhathi amaProteas ebhekene ne-Australia emidlalweni emibili yokuqala kuvule uDe Kock noDe Villiers kwathi kowokugcina kwavula u-Amla.

AmaProteas eshaya i-England ngo 2-0 bekuvula u-Amla noDe Villiers. Iningi labathandi bekhilikithi bakholwa wukuthi u-Amla akasiyena umdlali weT20 kodwa kowokugcina amaProteas eguqiswa yi-Australia ngamawikhethi ayisithupha ushaye ama-run angu-97 emabholeni angu-64 engazange akhishwe.

“Angiyizwa ingcindezi yokuthi kumele ngizikhombise ukuthi kungifanele ukuba kuleli qembu uma ngisenkundleni kweyeT20. Noma ngubani onikwa ithuba lokudlala ungena enkundleni ayojabulela ukwenza into ayithandayo. Nami ngenza ngokufanayo futhi ngeneme ngokuthi ngidlale kahle emidlalweni enginikwe kuyona ithuba,” kusho u-Amla kuthelevishini.

Izinkakha zekhilikithi eNingizimu Afrika zihlukene phakathi ngomdlali okufanele avule. URay Jennings owayelolonga amaProteas ukholwa wukuthi uDe Villiers kumele abhethe kunombolo 3 noma 4 ukuze avikeleke ekutheni asheshe aphume.

Ngakolunye uhlangothi uHerschelle Gibbs ubona uDe Villiers kumele avule ngoba ungumdlali wethu ohamba phambili okusho ukuthi kumqoka ukuthi abhekane namabhola amaningi ukuze athole isikhathi esanele sokushaya ama-run.

“Eminyakeni emibili edlule ngisebenze kanzima ukufunda izinto ezintsha nokukhula njengomdlali weT20. Ngicabanga ukuthi sengingcono kakhulu uma ngiqhathanisa neminyaka eyedlule. Kimina kuyohlale kuyintokozo ukufaka isandla ekutheni iqembu lenze kahle. Kuhlale kuyinto emnandi ngaso sonke isikhathi ukuthola ama-run. Ngiyethemba ukuthi ifomu yami yokuthola ama-run kuT20 izoqhubeka. Bonke abadlali emhlabeni bazokutshela ukuthi kumnandi ukuya eNdebeni yoMhlaba ugcwele ukuzethemba,” kusho u-Amla.

Imidlalo yamaProteas yeNdebe

yoMhlaba yeT20:

Kusasa: South Africa v England

(Wankhede Stadium, Mumbai, 4pm)

NgoMashi 20: South Africa v TBD

(Wankhede Stadium, Mumbai, 11.30am)

NgoMashi 25: South Africa v West Indies

(Vidarbha Cricket Association Stadium,

Jamtha, Nagpur 4pm)

NgoMashi 28: South Africa vSri Lanka

(Feroz Shah Kotla, Delhi, 4pm)