IPirates izobhukula koweFree State Stars
Eric Tinkler coach of Orlando Pirates during the Absa Premiership match between Orlando Pirates and Ajax Cape Town on 03 February 2016 at Orlando Stadium Pic Sydney Mahlangu/ BackpagePix Eric Tinkler coach of Orlando Pirates during the Absa Premiership match between Orlando Pirates and Ajax Cape Town on 03 February 2016 at Orlando Stadium Pic Sydney Mahlangu/ BackpagePix
MBONGISENI BUTHELEZI
EseGoli
I-ORLANDO Pirates izolwela ukubuyisa isithunzi uma isibhekene neFree State Stars emdlalweni we-Absa Premiership eGoble Park, eBethlehem kusasa ngo-7.30 ebusuku.
Lokhu kushiwo wumqeqeshi weBucs u-Eric Tinkler ofunge wagomela ngokuthi bafuna amaphuzu amathathu. Emdlalweni odlule iPirates ishayelwe ekhaya yiMamelodi Sundowns ngo 2-1. Ukulahla la maphuzu amathathu kulilimazile iqembu likaTinkler kwazise ligcine lehlele endaweni yesishiyagalolunye ekubeni bese lingene ku-Top 8 endaweni yesikhombisa ngemuva kokunqoba imidlalo emibili eyandulela oweSundowns.
IStars yona izofika kulo mdlalo nayo inenxeba njengoba ngempelasonto edlule ihlulwe yiJomo Cosmos ngo 1-0 kanti yayikade ithole isibhaxu sika 5-2 kuSundowns. I-Ea Lla Koto isiqhube imidlalo emine ingawini nosekuyishovele endaweni ka-12 ku-log. Yagcina ishaye omakhelwane iBloemfontein Celtic ngo 1-0 ngenyanga edlule bedlalela ekhaya.
“Umdlalo loyo ekufanele sibuye ngawo njengoba sihlulwe iDowns. Kufanele sivuke ngayo iStars. Sithemba ukuthi abadlali abebelimele bazobe sebeluleme kwazise ziningi izinsuku esizitholile zokuphumula. Yonke imidlalo esiyidlalayo ibalulekile, sisuke sifuna amaphuzu amathathu. Nakulona awukho umehluko,” kusho uTinkler.
Uveze ukuthi uThabo Qalinge noThandani Ntshumayelo bazobe sebekulungele ukudlala. UQalinge ubelimele kanti uNtshumayelo ubenomkhuhlane. Omunye umdlali ozobuya eqenjini leBucs, ukaputeni obambile uThabo Matlaba obengekho bedlala neSundowns ngenxa yamakhadi aphuzi. Indawo yakhe kwesokunxele emuva yathathwa uPatrick Phungwayo obese kuphele izinyanga engabonakali.
IPirates engayiqalanga kahle iligi ilwela ukuthi iqede ibalwa namaqembu ayisishiyagalombili azobe ephezulu.
Uma leli qembu lingakwazi ukugcina umgqigqo wokuwina emidlalweni engu-11 esele, kungenzeka ligcine libalwa namqembu amathathu azobe ephezulu ku-log. Ngokwenza lokho iPirates ingabe isizinike ithikithi lokubuyela emiqhubelwaneni yeCaf ngonyaka ozayo. Enye indlela yokubuyela kule midlalo kungaba wukuthi iPirates inqobe iNedbank Cup. Kulo mqhudelwano iqhathwe nabakhaya iKaizer Chiefs emzuliswaneni weLast 32 ngoMashi 5 eFNB Stadium.