Sesibheke umdlalo wethu neSupersport: Khama Billiat
Khama Billiat of mamelodi Sundowns celebrates his goal during the Absa Premiership match between Mamelodi Sundowns and University of Pretoria at the Bidvest Stadium in Johannesburg, South Africa on January 16, 2016 ©Samuel Shivambu/BackpagePix Khama Billiat of mamelodi Sundowns celebrates his goal during the Absa Premiership match between Mamelodi Sundowns and University of Pretoria at the Bidvest Stadium in Johannesburg, South Africa on January 16, 2016 ©Samuel Shivambu/BackpagePix
MBONGISENI BUTHELEZI
EsePitoli
UMDLALI oyisethenjwa kuMamelodi Sundowns uKhama Billiat uthi sebegxile emdlalweni we-Absa Premiership olandelayo wabakhaya abazowudlala neSuperSport United, eLucas Moripe Stadium, ngoMgqibelo ngo-8.15 ebusuku.
ISundowns ishaye i-University of Pretoria ngo 2-1 emdlalweni weligi eLucas Moripe Stadium ngempelasonto. UBilliat ukhethwe waba ngumdlali ovelele kanti ushaye negoli. Elinye lishaywe nguLeornardo Castro. Elokubika lamaTuks lishaywe nguThabo Mnyamane.
Ukunqoba kweqembu likaBilliat kulibuyisele phezulu ku-log njengoba lizihola phambili ngamaphuzu angu-30 ngemuva kwemidlalo engu-14. Bashiya iMpumalanga Black Aces esendaweni yesibili ngamaphuzu alinganayo kanti bahlukaniswe ngamagoli.
Lo mdlali uthe ukujabula kufanele kuphele ngemuva komdlalo ngoba banomdlalo obalulekile neSuperSport ngempelasonto.
“Sijabulile ukuthi sinqobile kumaTuks kodwa sekudlulile manje. Kufanele sigxile emdlalweni olandelayo ngoba sinomdlalo obalukile ngempelasonto. Asinaso isikhathi sokujabulela ukunqoba kwethu ku-University of Pretoria,” kusho uBilliat.
“Ukushaya igoli nokuba ngumdlali ovelele wosuku kuyangikhuthaza ngaphambi komdlalo wethu neSuperSport. Kwenza ukuthi ngiye kulo mdlalo nginokuzethemba. Kodwa okubalulekile kimina yiqembu hhayi ukuthi ngizuzani ngingedwa. Uma kunqoba lona iqembu mina ngiyajabula. Ngiyathemba ngisazowashaya amanye amagoli.” Lo mdlali uthe uchazekile ngendlela izinto ezihamba ngayo kuleli qembu wathi sengathi uyaphupha ngendlela izinto ezihamba kahle ngayo. Nokho uyivumile eyengcindezi ehambelana nokuhlala phezulu ku-log yize bejabulile ngokuthi basesicongweni.
“Ngiyakuthokozela kakhulu ukuba sesicongweni, ngiyethemba sizohlala isikhathi eside kuze kuphele isizini. Sihlangene futhi sidlala kahle kusukela emuva kuya phambili, siyakujabulela ukudlala ibhola.
“Ingcindezi ikhona kodwa kufanele siqhubeke nokuzehlisa. Sithokozile ukuthi siphezulu kodwa kuhambisana nengcindezi. Kuyasikhuthaza ukuthi siqhubeke senze kahle. Sinomdlalo omkhulu ngempelasonto okumele nakanjani siwuwine,” kusho uBilliat.
ISundowns kumele nakanjani iqhubeke iwine ngoba amaqembu amathathu angemuva kwayo awazibekile phansi ngokuqoqa amaphuzu. Lapha kubalwa i-Aces, Bidvest Wits neKaizer Chiefs.