Bazolungisa amaphutha koweSundowns

MBONGISENI BUTHELEZI

EseGoli

A KUKHO ukuthandabuza ukuthi umqeqeshi weKaizer Chiefs, uSteve “Mphathi” Komphela, ukulangazelele ngayo yonke indlela ukuwina umdlalo wezakhe neMamelodi Sundowns aqede ishobolo leminyaka engawini kuPitso “Jingles” Mosimane.

La maqembu azogadulisana kube kuncane indawo emdlalweni we-Absa Premiership eFNB Stadium, eSoweto, kusasa ngo-8.15 ebusuku.

ISundowns ivalise iChiefs unyaka kabuhlungu iyishaya ngo 3-1 emdlalweni wamanqamu weTelkom Knockout, eMoses Mabhida Stadium, eThekwini, ngoDisemba 16. Ngaphezu kwalokho uKomphela wagcina ngo-2003 ukushaya uMosimane.

UKomphela angajatshuliswa ukuthi uzoya emdlalweni wakusasa beyimiqemane bonke abadlali bakhe. Ngesikhathi bebhekene neSundowns kuTelkom Knockout u-Erick Mathoho nonozinti u-Itumeleng Khune babelimele kodwa bebeziqeqesha ngokugcwele neqembu kuleli sonto. UBernard Parker othinteke iChiefs ishaya iBidvest Wits ngo 2-1 koweligi ngoDisemba, izolo kuvele ukuthi usewumqemane.

“Sizobe singayanga kulo mdlalo ukuyodlalela ukuthi siyaziphindiselela. Kodwa ngesikhathi sidlala nabo kowamanqamu saphazamiseka. Kodwa into enhle ngukuthi uma kwenzeke kanjalo siyaye sibuye kube kuncane indawo. Sakwenza nakwabanye okubalwa kubona i-Orlando Pirates. Kowamanqamu kasizange sidlale kahle manje sinethuba lokuthi silungise lawo maphutha esiwenze kulo mdlalo,” kusho uKomphela.

“Kuhle ukuthi abadlali babuyile bonke akekho olimele, onenkinga umdlali osuke ethinteke kancane. Sijabulile ukuthi noMathoho (u-Eric) ubuyile njengoba enza umsebenzi omkhulu eqenjini. Ukuba khona kwakhe kuzosisiza kakhulu njengeqembu. Okubalulekile ngukuthi sinqobe uma sidlala njengoba siphelele kodwa uma sizophelela singanqobi akusho lutho

ukuba nabadlali bonke.”

Amagoli amaningi aseshaywe yiSundowns awamethusi umqeqeshi weChiefs ngoba uyalethemba iqembu lakhe.

“Iqembu labo selishaye amagoli amaningi kodwa into enhle ngukuthi nathi siyawashaya amagoli. Okuhle ngukuthi bona bazofuna ukubambelela eqenjini labo elanqoba lidlala nathi emdlalweni wethu owedlule. Thina sizofuna ukuthi siqhamuke namacebo amasha, akufuneki ukuthi silokhu siqhubeka sinza izinto ngendlela engeyiyo kodwa sibe silindele ukuthi sizothola umphumela owehlukile,” kusho uKomphela.

Ugcizelele ukuthi abakaphumi embangweni wesicoco seligi.

Ngakolunye uhlangothi uMosimane ufisa ukuyiphinda iChiefs ukuze iqembu lakhe liqhubeke nokuhlala esicongweni ku-log ye-Absa Premiership. Ukushaywa yiChiefs kungayiphazamisa iSundowns esidonse imidlalo eyisishiyagalombili ingashaywa kweyeligi. La maqembu ahlukaniswe amaphuzu amahlanu kuphela ngemuva kwemidlalo engu-12.

Imidlalo ye-Absa Premiership:

Namuhla: Ajax Cape Town v Bloemfontein Celtic (Cape Town Stadium, 8pm).

Kusasa: University of Pretoria v Jomo Cosmos (Tuks Stadium, 3.30pm); Orlando Pirates v Platinum Stars (Orlando Stadium, 3.30pm); Free State Stars v Golden Arrows (Goble Park, 3.30pm); Kaizer Chiefs v Mamelodi Sundowns (FNB Stadium, 8.15pm); Black Aces v Polokwane (Mbombela Stadium, 8.15pm).

NgeSonto: SuperSport United v Maritzburg Utd (Peter Mokaba Stadium, 3.30pm); Chippa United v Bidvest Wits (Nelson Mandela Bay).