NONTUTHUKO NGUBANE
UNINAKHULU wowesifazane oneminyaka engu-22 waseFolweni okusolwa isoka lakhe ngokumgwaza limfihle ngaphansi kombhede, uchaze ngendlela isidumbu somzukulu wakhe ebesiyiyona sixhonxwe ngommese yonke indawo.
Isidumbu sikaMbali Myeza sitholwe wumndeni wesoka lakhe ngoMsombuluko odlule simanxebanxeba. Isoka lakhe lizinikele emaphoyiseni emuva kokubaleka izinsuku ezimbili.
Izolo emngcwabeni obuseGolokodo eFolweni, uninakhulu omkhulisile, uNkk Mabele Myeza,kuqhume isililo echaza ngesimo isidumbu sakhe ebisiyiso sinenqwaba yamanxeba.
“Umzukulu wami ubunile, isidumbu sakhe besivuthukile, singabambeki sahluleka ngisho ukumcosha ngendlela abelimele ngayo,” kuchaza uNkk Myeza ngendlela uMbali abegwazwe ngayo emzimbeni.
“Angibazi ubuhlungu abhekane nabo, kwazise ubeyigwala. Sengathi ngiyayibona le nsizwa imklolodela, ifuna ukumgwaza. Ilindile ingane yomntanami, izitshela ukuthi uyazidlalela. Yalinda inxeba langena ngempela lagobhoza igazi. Umzukulu wami ubehambile eyozama umendo, engazi ukuthi usezobhekana nokufa,” kusho uninakhulu kaMbali.
Laba bebesathandane izinyanga ezimbili. Kuthiwa isoka lashaya lachitha emuva kwesehlakalo, lathumela umyalezo lathi makubhekwe intombi yalo ngaphansi kombhede.
Yize kungacaci ukuthi yini ebangele ukuthi isoka ligwaze intombi kodwa abaziyo bathi belinesikhwele okungenzeka ukuthi yisona esenze lagcina liyigwaza. Leli soka kusolakala ukuthi belisanda kubuya ejele ngelinye icala.
Udadewabo kamufi uManie nabangani bakamufi bahlulekile ukukhuluma bavele bakhihla isililo. Bathe kusenzima ukwamukela nokuxolela umsolwa.
“Ngisadiniwe ngokwenzekile, kunzima ukwamukela, angikwazi ukwamukela,” kusho uManie maqede wachiphiza. Umsolwa kulindeleke avele enkantolo maduze. Umndeni uthe ufisa ukulapheka ngokuthi umsolwa ajeziswe. Umndeni wesoka ubungabonwa emngcwabeni. Abesifazane be-ANC endaweni bebephethe izingqwembe ezinomyalezo olwa nokuhlukunyezwa kwabesifazane. Kwenzeka lesi sigameko nje kugunjwa inyanga yabesifazane lapho kushunyayezwa ivangeli lokuba bavikelwe kanye nezingane.