NONHLANHLA MKHABELA
ABATHANDI bobumnandi bazoqala impelasonto yeVodacom Durban July ngomcimbi wamahlaya i-99% Zulu Comedy ozoba se-Olive Convention Centre kusasa ebusuku.
Emcimbini wodumo lwamahlaya enziwa ngezilimi zesintu kuzobe kusina kudedelana osomahlaya okubalwa kubona uSifiso Nene, ozobe ephethe umcimbi, Simphiwe Shembe, Mpukane, Anele Shube, Siyanda Maphumulo. Jay Boogie, Aggrey Lonake nosomahlaya ongupopayi, uChester Missing.
Kuzobe kungokokuqala ukuthi uChester Missing, odume ngokuphonsa osopolitiki imibuzo eshisayo ohlelweni lwezindaba lukaLoyiso Gola i Late Nite News with Loyiso Gola olukhonjiswa ku-e.tv ne-eNCA, no-Aggrey Lonake, odume ngokulingisa osopolitiki abehlukene, bahlanganyele emcimbini we-99%.
UChester useke waxoxa nosopolitiki okubalwa kubona uTrevor Manuel, Sej Motau weDA, Shaka Sisulu, Mario Ambrosini we-IFP nentatheli yeCNN uRichard Quest.
Amathikithi okungena ayatholakala eComputicket asukela ku-R150. umcimbi uzoqala ngo-8 ebusuku.
UMonwabisi Grootboom weWow Entertainment ehlela lo mcimbi uthe amathikithi ahamba ngesivinini esikhulu ngakho bakhuthaza abanesifiso sokuwuhambela ukuba bawasukumele ngokushesha.
“Wunyaka wesibili umcimbi siwenza neVodacom. Ngonyaka owedlule amathikithi aphela kwathi abantu ababethanda ukuza emcimbini kodwa baphuza ukuwathenga bagcina besale ngaphandle. Siyabakhuthaza abathandi bamahlaya ukuthi bangalindi umzuzu wokugcina ngoba bazojabha sebethola amathikithi engasekho,” kusho uMonwabisi.