Ukubekezela kuthele izithelo kosengudokotela wesikhumba
ZANELE MSOMI
IZINGQINAMBA ahlangabezane nazo aziliqedanga iphupho lokuba udokotela wesikhumba uDkt Cebisilie Sibisi (33) njengoba ephothula ekupheleni konyaka.
Kusukela ngo-2010 uDkt Sibisi wayewa evuka ezama ukuthola isikhala ukuze aqeqeshwe emkhakheni wesikhumba. Izithelo zokubekezela kwakhe seziqalile ukubonakala njengoba nyakenye ethole indondo eqhathwe nabanye bakuleli bokunakekelwa kwesikhumba kwiRegistrar Presentation Dermatology Congress.
“Kule ngqungquthela kusuke kuhlangene odokotela besikhumba, bethula ulwazi ngomsebenzi asebewenzile. Mina ngethule udaba ngengane esiyisizile yelashelwa isifo sesikhumba esingajwayelekile,” usho kanje.
UDkt Sibisi waphothula u-matric eNiger High School, eGoli evele enothando lokuba ngudokotela. Nokho ngenxa yezinselelo ugcine enza unyaka owodwa kwiPharmacy ngaphambi kokufundela ubudokotela e-University of KwaZulu-Natal (UKZN).
Ngesikhathi efundela ubudokotela iminyaka eyisithupha wabona ukuthi uthando lwakhe wukunakekela isikhumba.
Wasebenza esibhedlela i-Addington, Wentworth naseGrace eMgungundlovu esaqeqeshwa. Sonke lesi sikhathi belingaphelile iphupho lokuba ngudokotela wesikhumba yize ebengasitholi isikhala. Uthe bambalwa abathathwayo ukufunda kulo mkhakha yingakho kwaba nzima nakuyena.
“Ungahlala ngisho iminyaka eyisihlanu ungasitholi isikhala sokuyoqeqeshelwa ukwelapha isikhumba. Isikhala ngize ngasithola ngo-2011 ngaqala ukufunda iminyaka emine. Ngibekezelile ngoba lo mkhakha awandile futhi nasesikoleni besingatshelwa kakhulu ngawo,” kusho uDkt Sibisi.
Uthe uzobe ebhala izifundo zokugcina ngo-Agasti, okuzomenza abe neziqu emkhakheni wokwelapha isikhumba. Ungomunye wabafake isandla kuvulwa kabusha iSkin Clinic, esibhedlela iKing Edward muva nje. Imali ehambisana nendondo ahlabane ngayo nyakenye uyifake kulo mtholampilo.
“Ngithanda lo msebenzi ngoba umphumela esigulini uyawubona, ngisho nabanye abantu. Akufani nokwelapha izifo ngoba noma umuntu esesindile akubonakali.”
Uthe uyawuthanda lo msebenzi ngoba awufukuzisani nangokusebenza ebusuku.
UDkt Sibisi oseneminyaka eyisikhombisa eshadile nomunye udokotela babusiswe ngezingane ezimbili.
“Abantu bacabanga ukuthi kuwumgomo ukushadana kodokotela kanti yingoba kufundwa isikhathi eside, kungcono ukuthandana nomuntu ofana nawe ozoqonda isimo,” kusho uDkt Sibisi.