IBafana ibivutha bhe ishaya iSpain
SOWETO, SOUTH AFRICA - NOVEMBER 19:South Africa celebrates the goal from Bernard Parker during the International Friendly match between South Africa and Spain at FNB Stadium on November 19, 2013 in Soweto, South Africa. (Photo by Duif du Toit/Gallo Images) SOWETO, SOUTH AFRICA - NOVEMBER 19:South Africa celebrates the goal from Bernard Parker during the International Friendly match between South Africa and Spain at FNB Stadium on November 19, 2013 in Soweto, South Africa. (Photo by Duif du Toit/Gallo Images)
MTHOKOZISI MNCUSENI
Bafana Bafana (0) 1
Spain (0) 0
U KUNQOBA kweBafana Bafana umdlalo omqoka kunayo yonke kulo nyaka bebhekene nompetha bomhlaba iSpain izolo ebusuku e-FNB Stadium, kungase kuphenduke ize leze kulandela isinqumo sezivakashi sokushintsha ngenkani abadlali abangaphezulu kwabayisithupha.
Umthetho umile ekutheni emidlalweni yobungani kuvumeleke izinguquko eziyisithupha. Okungaphezulu kwalokho kuphendula umdlalo ufane nowokuzivocavoca. Lokhu kunqoba kungenzeka kungayisizi ngalutho iBafana ekuklelisweni kwamazwe kuFifa yize ihlule izwe elikleliswe kunombolo 1.
Kujabulise abaningi ukubonakala kuka-Andile Jali eqala umdlalo noDean Furman kodwa okusheshe kwacaca lapha ukuthi iBafana izothwala kanzima kwazise bekuba wumzukuzuku ukuthola ibhola uma likuSpain.
Obekuyingozi obekwenziwa abadlali basemuva ukuthembela ku-offside nokho kubasindisile kwazise emizuzwini yokuqala uDavid Villa ulibeke kabili enethini kodwa aphikwa ngoba esesemhlabeni ongamfanele.
Lo mkhuba uqhubeke isiwombe sokuqala sonke iBafana isizwa umsizi kanondweba.
Kucishe konakala ngomzuzu ka-7 uThabo Nthethe ekhutshwa yibhola endaweni embi kodwa bamlamulela ozakwabo ngokuvimba kucishe konakala.
Umnyakazo kaTokelo Ranti othwale abadlali beSpain waze wangena nabo ebhokisini uphelele emoyeni ngomzuzu ka-15 ehluleka ukuthola uzakwabo.
Phakathi kwezinto ebezijabulisa abalandeli kulo mdlalo ukuthi bekuthi uma likuBafana ibhola bangasabi ukwenza ngendlela abazi ngayo kwaze kwavela nethuba kuBernard Parker kodwa waliqondisa kuCassilas ngomzuzu ka-18.
Nakuba umdlalo ububukeka sengathi uyehla ukushisa ngokuhamba kwesiwombe sokuqala kodwa iBafana ibilokhu izame njalo ukushayela ipali ikude okuyizimpawu zokuzethemba.
Zicishe zaya ekhefini iBafana ihamba phambili kodwa ibhola ebelingqofwe uBongani Khumalo ladlula kancane eceleni kwepali.
Zibuya ekhefini umqeqeshi weBafana uGordon Igesund wenze izinguquko ezimbili ekhipha uDylon Classen noKhumalo wafaka uSiphiwe Tshabalala noSiyanda Xulu. Ngokunjalo noVicente del Bosque ukhiphe uCassilas wafaka uVictor Valdes. Bekufanele enze kangcono uRantie ngomzuzu ka-49 kodwa wakha amabhilidi engamakiwe. UKamohelo Mokotjo ungenele uJali obeselimele.
Ngomzuzu ka-56 uParker ubeke iBafana phambili kwachwaza inkundla ephaselwa uMokotjo.
Ngemuva kwegoli likaParker iSpain besilokhu sihlasele njalo kwaze kwaba kulimala uValdes kanti iSpain sesibashintshe bonke abadlali kwaphoqeleka ukuba baqede umdlalo bengasaphelele kwavimba u-Alvaro Albeloa. Ubuye washintshwa lo mthetho kwavimba uPepe Reina okuyisenzo esishiye u-Igesund efuthelana.
n Kusenjalo iGhana ne-Algeria bajoyine iNigeria, Ivory Coast neCameroon koweNdebe yomhalab eBrazil ngonyaka ozayo kulandela imiphumela yemidlalo yayizolo ebusuku. IGhana ishaywe ngo 2-1 kodwa yanqoba ngo 7-3 sekuhlanganiswa yomibili imiphumela.
n Komunye umdlalo iBurkina Faso ikhale ngaphansi ishaywa yi-Algeria ngo 1-0 kanti kowomlenze wokuqala eBurkina Faso kwaba u 3-2.