Oluka-Arthur luzonikeza ugqozi entsheni
INKOSI ye-kwaito u-Arthur Mafokate, ngokubambisana ne iCan Do, izonikeza intsha ithuba lokungena emkhakheni womculo ngohlelo lokuvumbulula ikhono i-U Can Do It, oluzodlala kuSABC 1 ngoMeyi. INKOSI ye-kwaito u-Arthur Mafokate, ngokubambisana ne iCan Do, izonikeza intsha ithuba lokungena emkhakheni womculo ngohlelo lokuvumbulula ikhono i-U Can Do It, oluzodlala kuSABC 1 ngoMeyi.
INTATHELI YESOLEZWE
K UZOBANGWA umklomelo kaR150 000 nenkontileka yokuqopha ne-Universal Records ohlelweni olusha lwethelevishini lokuvumbulula amakhono oluzokhonjiswa kuSABC 1 kusukela ngenyanga ezayo.
Lolu hlelo olusihloko sithi U Can Do It lwenziwe ngokuhlanganyela ngowaduma njengenkosi yomculo we-kwaito u-Arthur Mafokate nenkampani eyakha amakani eziphuzo iCan Do.
NgoMeyi 7 kuzoqala ukuvela kwalabo abangu-25 abaphumelele ukungena ohlelweni ngokuya kwinhlolokhono ebiseGoli, izinsuku ezimbili lapho u-Arthur nozakwabo bebethungatha abantu abanekhono lokucula, ukurepha nokudansa.
Ohlelweni oluzoba yizigaba ezingu-13 kuzofakwa esikoleni esibizwa ngeCan Do Academy labo abaphumelele lapho bezobe befundiswa kabanzi ngomculo, okufaka ukubhala nokusetshenziswa kwephimbo, ukudansa, ukunakekela indlela obukeka ngayo nokunye.
Phezu kwalokhu, abancintisanayo bazonikwa izinselelo ezinzima zokubaqeqesha baphinde bahlanganyele nosaziwayo okubukelwa kubona, kanjalo nongoti abazobanikeza ulwazi nezaluleko ngemikhakha eyehlukene.
Kuzothi njalo ekugcineni kwesiqephu sohlelo abancintisanayo baveze ukuthi ubani abangathanda ukumbona epakisha imithwalo yakhe ebamba afika ngayo nesizathu salokho.
Lokhu kuzoba yindlela yokuvezela umbukeli okwenzeka ngemuva kwamakhamera ngobudlelwane balabo abancintisanayo.
Imenenja yezokudayisa yeCan Do u-Alex Bouwer, ithe lolu hlelo luzoba nomehluko ngoba lwenziwe ngokubambisana kwabantu abayisibonelo sokuthi ungenza noma yini uma unengqondo yokuthi akukho okungakwehlula.
“I-Can Do inomlayezo omuhle okhula ngesivinini eMzansi, wokuthi yonke into ingenzeka empilweni uma unengqondo yokuthi akukho okungakwehlula. Yingakho sibambisene nomuntu obe yisibonelo salokhu impilo yakhe yonke, saseka lolu hlelo lokukhulisa nokuklomelisa intsha enethalente,” kusho u-Alex.
Uthe inhloso enkulu yohlelo wukugqugquzela intsha ukuthi ingene emkhakheni womculo njengomsebenzi, ngokuthi bayivezele ubuhle kanjalo nobubi ngawo.
U-Arthur oseneminyaka ekule ndima kulindeleke ukuthi enze umsebenzi oncomekayo kulokhu.