Izobe ithe chithi saka imicimbi ngePhasika
USPHUMELELE Mbambo ungomunye wabaculi abazobe bebusisa abathandi bomculo ngePhasika USPHUMELELE Mbambo ungomunye wabaculi abazobe bebusisa abathandi bomculo ngePhasika
BAZOPHUMA ngezindlela ezahlukene bebheke emabandleni nasemicimbini abathandi bobumnandi njengoba kungase-nsuku zatshwala kube yiPhasika.
Kusukela ngomhla ka-5 kuya ku-8 kwephezulu kuhlelwe uhide lwemicimbi kweminye yayo okuzobe kunandisa abaculi.
Kwebhekwe ngabomvu ngozobe useSikhawini, eMfolozi College okuzobe kudunyiswa kuwona. IZwi leNkosi lizobe liphethwe nguBishop Basil Tryon noBert Pretorius.
Emculweni kuzobhekwa uHlengiwe Mhlaba noThobekile owazakhela udumo ezinkonzweni zamatende.
NasePort Shepstone kuzobe kuyiso leso u-Amen ushetshwa nomculo woKholo emgubhweni okunganga-tshwazwa ukuthi uzoheha izindimbane zabantu ngendlela okuboshelwe ngayo uhide lwabaculi abanohlonze.
Lo mcimbi ohlelwe nguPastor Mjosty no-Irvin Sihlophe obizwa ngoVukile noKhozi FM Gospel Festival uzobe uqala ngqa ukuba khona kanti uzobanjelwa ezinkundleni zemidlalo oGwini.
Abaculi nezimenywa ezizobe zishiyelana inkundla kubalwa uSipho Makhabane, Sphumelele Mbambo, Hlengiwe Mhlaba, Kholeka, Sgwili noBabo, Solly Mahlagu, Fikile Mlomo, Thobekile, Abanqobi, Vuma Zion, Pastor Cwezu, Dudu Khoza, Pastor Zondo, Dr DS Gumbi, Bishop Thanda Zulu, Linda Sibiya, Sbu Buthelezi noFather Smilo Mngadi.
Amathikithi alo mcimbi ayatholakala eComputicket ngo-R120, esangweni izobe isithe xaxa njengoba ezobiza u-R150.
Kuzobe kuyiso leso oLundi eMancinza Crystal kusukela ngoLwesihlanu lapho uDJ Bongz ezobe ethula khona i-albhamu yakhe ehambisana noDJ Syaro, DJ Eugene noDJ Pvee. NgoMgqibelo kuzobe kungesifanayo umculi we-hip hop uZakwe echoma ngomculo wakhe.
ENewcastle, e-Armcor Dam lizobe ligaya ngomunye umhlathi njengoba kuzobe kuthe ukwehluka uma uqhathanisa nale micimbi engenhla ngenxa yabaculi abazonandisa.
Kule ndawo isteji sizobe siphethwe nguTira, Oskido, Zinhle, Mahoota vs Vetkoek, L’vovo Derrango, Zakwe, Shota noSfiso Ncwane.
Abaphathi bohlelo kuzobe kungu-DJ Oros, Khetha Gwala noSthandwa Nzuza abangabasakazi boKhozi FM.
Nakhona amathikithi asekhona ezitolo zaseShoprite naseComputicket asukela ku-R120 kuze kufinyelele ku-R150. Esangweni azobe esenyukile.