Bagixatshezwe ngoR100 000 behlonishwa ngezindondo kowasoGwini
UNKSZ Lungile Mbili wenkampani Umlando Creatives neMeya yoMasipala waseRay Nkonyeni iKhansela Zodwa Mzindle beklomelisa uNksz Nomvelo Cele weMaNdosi Deco X Events ngomklomelo wakhe we-Emerging Business of The Year kuma-The Next Billionaire Business Awards, abese-Ugu Indoor Sports Centre, eGamalakhe, ePort Shepstone ngoLwesihlanu ebusuku
Image: SIMANGALISO NTSHANGASE
OSOMABHIZINISI bemikhakha eyahlukene yezamabhizinisi, oningi labo lizinze ezindaweni ezakhele uMasipala wesiFunda Ugu - bahlonyuliswe ngoR100 000 wokubahlonipha ngenxa yemisebenzi yabo emihle, nangenhloso yokubakhuthaza ukuzikhandla emabhizinisini abo.
Lokho kwenzeke emcimbini womncintiswano wokuklomelisa osomabhizinisi abasafufusa ngezindondo zokubahlonipha, obuwenziwe ihlandla lesithupha nonyaka - i-The Next Billionaire Business Awards, obuse-Ugu Indoor Sports Centre, eGamalakhe, ePort Shepstone, oGwini oluseNingizimu yeKwaZulu-Natal ngoLwesihlanu ebusuku.
Emikhakheni ewu-20 yosomabhizinisi abaklonyeliswe ngezindondo, obekuxhaswe wuMnyango wokuThuthukisa uMnotho, ezokuVakasha nezokoNgiwa kweMvelo eKZN noMasipala waseRay Nkonyeni; emine yayo ehlomule nangemali ngowe-Emerging Business of The Year onqotshwe wuNksz Nomvelo Cele weMaNdosi Deco X Events, wahlabana ngesamba sikaR10 000.
Owesibili ngowe-Businesswoman of The Year, onqotshwe wuNksz Amanda Mseleku we-Eve's Eatery, wahlomula ngesamba sikaR20 000; kube ngowesithathu we-Businessman of The Year, onqotshwe wuMnuz Vusi Sibiya weSibiya Funeral Services, naye wakhala wemuka noR20 000.
UNKSZ Noluthando Zungu wenkampani i-Amandlenkosi Farms (wesibili ngakwesokunxele) eklonyeliswa ngomklomelo omkhulu wosuku i-Top Achiever of The Year emcimbini wokuklomelisa osomabhizinisi i-The Next Billionaire Business Awards, obuse-Ugu Indoor Sports Centre, eGamalakhe, ePort Shepstone ngoLwesihlanu ebusuku
Image: SIMANGALISO NTSHANGASE
Owesine ngowomklomelo omkhulu wosuku we-Top Achiever of The Year, ohambe noNksz Noluthando Zungu we-Amandlenkosi Farms, wona obuhambisana nesamba sikaR50 000.
UNksz Zungu waseBetania, khona ePort Shepstone - uthe ukunqoba kwakhe kulo mncintiswano kuwumphumela wokusebenza kwakhe kanzima, nokuhlale ebambisene nethimba asebenza nalo enkampanini yakhe ukukhiqiza umkhiqizo wezinga eliphezulu emakhasimendeni abo.
"Enkampaninin yami ngidayisa umkhiqizo wezinkukhu zenyama nezamaqanda, bese futhi sidayisa namaveji - kanti futhi sihlale siqinisekisa ukuthi umsebenzi wethu ugculisa wonke amakhasimende ethu, yingakho manje silana esikhona ngalokho. Sengibheke ukuthi lo mvuzo engiwutholile ngiwutshale kulo ibhizinisi lami ukuze liqhubeke liye phambili," usho kanje.
BEKUKUHLE kanjena ngenkathi kuklonyeliswa uNksz Amanda Mseleleku (kwesokunxele) we-Eve's Eatery ngomklomelo womkhakha we-Businesswoman of The Year emcimbini womncintiswano wezindondo zosomabhizinisi i-The Next Billionaire Business Awards, abese-Ugu Indoor Sports Centre, eGamalakhe, ePort Shepstone ngoLwesihlanu ebusuku
Image: SIMANGALISO NTSHANGASE
Iwu-10 isiyonke imikhakha okuklonyeliswe osomabhizinisi kuyona; kanti kweminye kunqobe uNksz Noxolo Shabalala weBhubesikazi Farms emkhakheni we-Agriculture, kwi-Beauty and Image Consulting kunqobe uNksz Hloniphile Jula weHlonie's Hair and General, uMnuz Nkanyezi Dlamini weSam and Sylvia Harding kwi-Industrial Sewing and Production, kwi-Best Business in Cleaning & Hygiene kwanqoba uMnuz Phumlani Ngcobo weLanies Carwash, kwi-Food and Beverage kwanqoba uNksz Sbahle Cele we-EmaNgidini Anesintu, kwi-Culinary Arts kunqobe uNksz Sindi Mkhize weSingela Creatives, kwi-Manufacturing and Recycling kunqobe uMnuz Mongi Nkonyeni, kwi-Best Mobile Café kunqobe uNksz Pearl Shusha weProwBerry Cafe, uNksz Nonhlanhla Dlamini we-Ebukhosini Lifestyle kwi-Tourism and Hospitality, kube wuMnuz Owen Lungelo Zitha kwi-Best Content Creator, uMnuz Ntokozo Biyela we-K.O.R Production kwi-Best Business in Digital Production, uNksz Nomfundo Mhlongo we-033 Sports kwi-Best Business in Sports, kwi-Spa & Therapeutic Services kunqobe uNksz Khethiwe Maleka weKidah De-Beauty Spa, kwi-Cosmetic Manufacture kunqobe uNksz Chesley Khwela weK-Chesley, bese kuba woMnuz Sifiso Hadebe weMakhululu Protection noMnuz Bablo Mavundla weBablo Funeral Support - abahlonishwe ngezindondo zomkhakha we-Acknowledgement Award ngomsebenzi wabo omuhle.
UNksz Lungile Mbili, umnikazi wenkampani Umlando Creatives - ohlela lo mcimbi, uth jabule kakhulu ngokuthi umcimbi wakhe ube yimpumelelo, futhi wabonga kakhulu kubona bonke ababambe iqhaza ukuthi ube yimpumelelo, ikakhulu abawuxhasile okuwuMasipala waseRay Nkonyeni noMnyango wokuThuthukisa uMnotho, ezokuVakasha nezokoNgiwa kweMvelo.
"Sijatshuliswe nawukuthi kulo nyaka sibe nemikhakha emine engahambanga nezindondo kuphela, kepha abanqobile kuyona bagixatshezwe nangemali ezobasiza kakhulu ukuqhuba umsebenzi wabo, esifisa ukuthi kuqhubeke kanjalo nakweminye imikhakha ngokuzayo, ukuze labo somabhizinisi bakhuthale ukuqhubeka nemisebenzi yabo emihle," kusho uNksz Mbili.