Indodakazi kaZuma iyaziphendulela ngabayiswe e-Ukraine

UMNUZ Blessing Khoza uyindoda esolwa ngokujuba abesilisa abangu-22 bakuleli ukuba babuthwe ukuba ngamasosha akhokhelwayo e-Ukraine. Lokhu kushiwo ngamadodakazi kaMnuz Jacob Zuma, uNkk Dududzile Zuma-Sambudla noNkk Nkosazana Zuma-Mncube.

Laba besifazane bavulele uKhoza amacala,okubalwa kuwo elenkohlakalo, elokushushumbisa abantu ngenhloso yokubaxhaphaza nelokuhanjiswa kwabakuleli ngokungemthetho beyiswa endaweni enezinxushunxushu.

UNkk Zuma-Mncube uvule amacala esiteshini samaphoyisa esiseSandton eGoli ngempelasonto, esola uKhoza, uNksz Siphokazi Xuma nodadewabo uNkk Zuma-Sambudla ngabakwenza beholela amadoda Ophathe, amanye ayizihlobo, kuthiwa ayiswa eRussia kanti ayoba yingxenye yamabutho alwayo e-Ukraine. Kubikwa ukuthi la madoda asayiniswa amaphepha ayengawaqondi ngaphambi kokuyiswa empumalanga ye-Ukraine.

UNkk Zuma-Sambudla uziphendulele ngoMsombuluko, wazichitha izinsolo zokuthi wabutha amalungu omndeni wakhe nabanye ukuba bayoba ngamasosha akhokhelwayo e-Ukraine. Leli lungu lephalamande lithe nalo lakhohliswa wuKhoza owayethe kunabantu abaziyo abanohlelo lokuqeqeshwa kwamasosha eRussia.

UNkk Zuma-Sambudla uthe wabe esezibandakanya nalolo hlelo futhi walibangisa eRussia ukuze acijelwe ubusosha, okuwuhlelo olwathatha inyanga. Uthe ngaleso sikhathi akukho okwakumhlanganisa nokulwa noma ukuqeqeshelwa ezempi.

Esekhona uNkk Zuma-Sambudla uthe wathola ukuthi lolu hlelo lungakwazi ukubandakanya abantu abaningi. Uthe wabe esephakamisa ukuthi kulandwe abanye abangu-22 ukubamba iqhaza ohlelweni ayekulo.

"Ukuxhumana kwethu kwaqala ngoba wanginxenxa, hhayi lokhu okushiwoyo. Ngathemba imininingwane ayenginike yona, njengoba sasingekho isizathu, ngaleso sikhathi, sokusola inkohlakalo nokuholelwa Ophathe," kusho uNkk Zuma-Sambudla ngokuxhumana kwakhe noKhoza.

Uqobele phansi konke akwaziyo ukusuka nokuhlala kulolu daba encwadini efungelwe ebonwe yiphephandaba elinguzakwabo waleli, iDaily News futhi avulele ngayo amacala uKhoza embuthweni wamaphoyisa akuleli.

Umbutho wamaphoyisa owaziwa ngamaHawks noma ngeDirectorate for Priority Crime Investigations, ukuqinisekisile ukuthi uphenya udaba lwamadoda okusolwa ukuthi abuthelwe ukuba ngamasosha akhokhelwayo e-Ukraine.

Okhulumela oKlebe, uBrigadier Thandi Mbambo, uthe udaba luzodluliselwa kuMqondisi woPhiko lokuShushiswa koMphakathi njengoba sekuqala uphenyo.

  "Uphenyo luyaqhubeka njengamanje futhi lubandakanya ofakazi, imithombo nokunye okumqoka ekutholeni ubufakazi. Uma bonke ubufakazi sebuqoqiwe futhi nezinyathelo zophenyo seziphothuliwe, udaba luzodluliselwa kuMqondisi woPhiko lokuShushiswa koMphakathi ukuze anqume ngalo," kusho uBrigadier Mbambo.