Umkhuleko ngabesifazane abasembonini yabangcwabi

BAZOLUBIKELA uNkulunkulu usizi ababhekene nalo abesifazane abasembonini yokungcwaba. Lokhu kuzokwenzeka kwindumezulu yomkhuleko abazokuba nawo ngo-Okthoba 28, ehholo elikwa-G, KwaMashu, enyakatho yeTheku.

Inhlosongqangi yalolu hlobo lomkhuleko kuhlalukile ukuthi ukuzobikela uNkulunkulu ngezingqinamba ezahlukene abesifazane abakule mboni ababhekene nazo. Umhleli walo mkhuleko nguNksz Busisiwe Zondi webandla iBantu Methodist Church of Southern Africa ngaphansi kwesiFunda iBMC KwaZulu-Natal Coastal. Utshele Isolezwe ukuthi ufikelwe umbono ojulile wokuba kuhlelwe lolu hlobo lo mkhuleko.

''Ngifikelwe umbono wokuba bahlanganiswe bonke abesifazane abasembonini yokungcwaba, bese sibikela uNkulunkulu ngazo zonke izingqinamba ababhekana nazo kulo msebenzi abawenzayo. Lokhu kwangifikela ngemuva kokuba ngangikade nginabo komunye umcimbi base bezwakalisa izinkinga abaye bebe nazo kulo mkhakha abakuwona,''echaza.

Eqhuba uthe empeleni wayekade ehambele isigcawu semboni yabangcwabi esasihlanganisa nabo abesifazane abakule mboni. ''Ngesikhathi kuqhubeka lesi sigcawu ngakuqaphela kakhulu ubuhlungu abesifazane abazithola bebhekana nabo ngaso sonke isikhathi,'' echaza.

Phakathi kokunye athe wakuthola futhi wakuqaphela ukuthi iningi lalaba besifazane bazithola bebhekene nengwadla kwezezimali. Uthi wathola nokuthi ukungcwaba abantu abehlukene njalo ngezimpelasonto kugcina kubagqilaza nabo ngokwesimo somqondo.

"Ngathola ukuthi laba besifazane abanabo abantu abakwazi ukuhlala nabo phansi bababikele ngosizi ababhekene nalo kule mboni. Khumbula phela ukuthi lapha sikhuluma ngabantu besifazane kodwa abenza umsebenzi obucayi ngalolu hlobo, angeke ke kungazweli kubona,'' usho kanjena.

Uthe wabe esebona kumqoka kakhulu ukuba kwenziwe lo mkhuleko ngethemba elikhulu lokuthi bazokuthola ukulapheka ngokomphefumulo ngemuva kwale nkonzo.

"Sihlose ukuthi lo mkhuleko ubelaphe amanxeba. Ngokwethemba uNkulunkulu siyazi ukuthi nakanjani lokho kuzokwenzeka,''echaza.

Yize ke lona kungumkhuleko wabesifazane abasembonini yokungcwaba kodwa uthe bakubhekile nokuthi babe khona nabesifazane abasemabhizinisini ehlukile. Uveze ukuthi umkhuleko uzobe ubusiswe ukubakhona kwabesifazane abanohlonze abazokwethula izinkulumo baphinde bashumayela iZwi likaNkulunkulu.

Phakathi kwabo ubalule igama likaMfu Thabile Nkosana webandla i-Apostolic Faith Mission of Southern Africa (AFMSA), uMfu Siwe Ndlovu kanye neNdlovukazi uMapule Mchunu. Lo mkhuleko uthe bawethe elokuthi yiWomen in Funeral Business Prayer.