Inkalakatha Yesonto

INTOKAZI yaseThekwini uNonkululeko “Lefty” Mlaba, odlalela iqembu lesizwe amaProteas neHollywoodbest Dolphins kwabesifazane, ugile izimanga ngenkathi iCricket South Africa iklomelisa abadlali abenze kahle emdlalweni wekhilikith, emcimbini obuse-Emperors Palace, eGoli Gauteng, ngoLwesine olwedlule.

Kulo mcimbi uNonkululeko ukhale wemuka nemiklomelo emine ebibhekwe ngabomvu okungowe-SA Women’s T20 International Player of The Year, Women’s Player’s Player of The Year, Women’s Best Delivery nowe-Women’s Player of The Year.

Ezintweni ezenze leli nxele lahlabana, ngama-wikhethi angu-12 eliwathathe emqhudelwaneni i-2024 T20 World Cup okulenze laqeda endaweni yesibili kwabathathe amaningi. Ngaphezu kwalokho, uMlaba uqophe umlando wokuba ngowesifazane wokuqala othathe amawikhethi angu-10 emdlalweni we-test ngesikhathi bebhekene ne-England ngoDisemba. Ukuhlabana kukaMlaba ngemiklomelo kumenza abe ngomunye wabadlali abazobe bebhekiwe emqhudelwaneni i-ODI Cricket World Cup ezoba se-India ngenyanga ezayo.