Abapheka abafundi ezibalweni nesisombululo sabesaba ezobuchwepheshe
ABEHLANGANO ecija abafundi ezibalweni namasu okunqoba inkinga yabafundi abehlulwa ngezobuchwepheshe
Image: SITHUNYELWE
ENINGIZIMU Afrika isalokhu iqhubeke njalo inkinga yezemfundo okubukeka igqama kakhulu emagunjini okufundelwa kuwona izibalo okubukeka kuseyinselelo enkulu ukuthi abafunde bazifunde futhi baziphase ngamalengiso kanjalo neziyamene nobuchwepheshe nesayensi.
Lokho kwafakazelwa wucwaningo lwe-Trends in International Mathematics Science (TIMSS), olwadalula ukuthi izingane ezifunda uGrade 5 ezweni zazikeliswe emsileni emazweni awu-59 enza kahle ezibalweni nasezifundweni zesayens, lokho okuvela ukuthi kuba yinkinga kuze kuyofika esigabeni samabanga aphezulu emfundo.
Kanjalo futhi noMnyango wezeMfundo eyiSisekelo ngo-2024 udalule ukuthi sehle sisuka ku-49% saya ku-39% isibalo sabafundi ba-matric abakhetha i-maths ngqo kusuka ku-2010. Nanokuthi kulabo ababhale ukuhlolwa kwango-2024, wu-17.4% kuphela owathola ngaphezu kwa-60% ezibalweni, okwenza ukuthi zikwazi ukungena ohlelweni lokukwazi ukwenza izifundo ze-Science, Technology, Engineering and Mathematics (STEM) ezikhungweni zemfundo ephakeme.
Nokho inselelo enkulu kuseyikhona ukuthi ezingaweni zasemakhaya izingane ziqala isikole sezivele sezisele kakhulu ngeminyaka, ekubeni uhlelo lokufunda olusebenza manje alunazo izinhlelo eziqondene nabo ngqo ukubasiza ukuthi bakwazi ukuthola ulwazi lwabasele kukho.
Yingalezo zizathu abenhlangano yezemfundo ezinze eGoli ecija abafundi ngezibalo nezobuchwepheshe nesayensi i-OLICO sebephose inselelo yokuthi abafundi bakhuthalele ukuthi kuthi noma sebeqedile ukufunda kwasesikoleni, babe khona futhi kwezinye izinhlelo zokufunda zantambama nangezimpelasonto ukusiza ukuthi bacijeke kokubahlulayo.
UMnuz Andrew Barrett we-OLICO uthe inselelo enkulu ngohlelo lokufunda olusetshenziswa ezikoleni zaseNingizimu Afrika manje wukuthi alubasizi abafundi abasuke besalele emuva ngalezi zifundo ezithathwa ngokuthi “zinzima’’.
ABEHLANGANO ecija abafundi ezibalweni namasu okunqoba inkinga yabafundi abehlulwa ngezobuchwepheshe
Image: SITHUNYELWE
“Kunalokho lwenza ukuthi bame ndawonye futhi bangacijeki ngolwazi ngendlela okumele ngabe bacijeka ngayo, okwenza ukuthi kuthi sebefika emabangeni aphezulu, kube wukuthi basalele emuva ngokwezinga ongalifanisa neminyaka emithathu kuya kwemine yokufunda abangayifundanga ekubeni beyifundile, bese belahlekelwa wukuzethemba nogqozi lokufunda okuholela ekutheni bangenzi kahle ezifundweni zabo,” kusho uBarrett.
“Yingakho sikhuthaza abafundi ukuzibandakanya nokuqinisa ezinhlelweni ezinjengalolu nathi esilwenzayo ngoba yilapho abakwazi ukukhululeka khona, bavuleleke nokubuza imibuzo okungenzeka bangakhululeki ukuyibuza uma kufundwa ezikoleni abafunda kuzona, bese beyawazi ukubuyelwa wukuzethemba nokuthanda ukufunda,” usho kanje.
Uthe sekucacile ukuthi lolu hlelo lungezinye zezinhlelo ezimbalwa, uma kungesilo lodwa olukhona, kwezingasiza ukuphucula ukufunda kwabaafundi okuzokwenz ukuthi bakwazi ukwenza kahle kulezi zifundo, bese besizakala ngokuthi bekwazi ukuqhubeka nezifundo ezeyamene ne-STEM uma sebeqhubekela ezikhungweni zemfundo ephakeme.
“Lokhu kumele kusetshenziswe ukuthi kube yicebo lokutshala ekusaseni lomnotho wezwe lethu ngoba uma kufuleka ezemfundo, kuzofukuleka nezomnotho ngakho sikhuthaza nabaholi bezamabhizinisi, abatshalimali nezinhlaka ezahlukene ezizimele nezohulumeni ukweseka izinhlelo ezinjengalolu ukuze zisebenze kahle,” kucebisa uBarrett.