Isuse izinkulumo iToyota ngeLegend 55
IZINGWAZI zebhola uJosta Dladla, Brian Baloyi, Thabo Mooki noSibusiso Zuma zitetemuka ngeToyota Hilux Legend 55
Image: SITHUNYELWE
BAZISUSILE izinkulumo kwaToyota South Africa Motors beqinisekisa ukuthi iHilux Legend 55 izoqala ukudayisa kusuka ngo-Agasti 18.
IHilux iyintandokazi yeveni kuleli njengoba kuyiyona moto ehlale isesicongweni sokudayisa kakhulu zinyanga zonke.
ILegend 55 ngeyokugubha ukuphela kweminyaka engu-55 kwaqala ukudayisa iHilux kuleli.
Eyokuqala yenziwa kusuka ngo-1968 kwaze kwaba wu-1972.
Ekhona njengamanje, okuyinhlobo yesishiyagalombili, iqale ukwakhiwa ngo-2015 yadayisa kuleli kusuka ngo-2016.
ILegend 55 ifika nje, bekugcine ngeLegend 50 ngo-2019.
Ngaphakathi ihluke lapha nalaphaya iToyota Legend 55 kunamanye amaHilux
Image: Fanelesibonge Bengu
Embuthanweni waminyaka yonke wokuvula unyaka wakwaToyota iState of the Motor Industry, izikhulu zale nkampani zakuveza ukuthi zizokwethula iHilux.
Zisebenzise impelasonto edlule ukuthi ibonakale okokuqala emgwaqweni ngokuthatha izinkakha zeKaizer Chiefs zizitetemukise ngayo ziya eMoses Mabhida Stadium.
Lezi zinkakha bezibhulela amazolo nezaKwaZulu-Natal umdlalo weToyota Cup phakathi kweKaizer Chiefs ne-Asante Kotoko. Sekuwumlando ukuthi iKotoko yaseGhana igcine iqukule inkomishi sekukhahlelwa amaphenathi kulandela ukuthi umdlalo uphele ngo-0-0.
IToyota Legend 55 ifika ne-styling bar eqoshwe igama layo
Image: Fanelesibonge Bengu
IHilux Legend 55 ifakwe i-styling bar esihlukile esibhalwe uLegend 55. Ifika ne-towbar kanjalo ne-roller shutter esikhenkeni esine-rubber ukuze ingaklwebheki uma ulayisha impahla. Ngemuva futhi bayiqophe uLegend 55 nokuyinto oyithola ezinhlangothini ezicabheni zangaphambili.
Ngaphakathi ezihlalweni zesikhumba iqoshwe igama layo nangasegiyeni kubhalwe u-55th Anniversary.
KwaToyota nokho bathe imininingwane ephelele ngayo bazoyidalula uma isizoqala ukudayisa okuhlanganisa nentengo nenjini ehamba ngayo.
Nokho kulindeleke ukuthi ihambe ngeyi-2.8l GD-6 yodumo eno-gearbox oyi-6 speed auto.
Akukazeki phakathi kwezintathu ukuthi iyiphi njengoba kukhona enamandla angu-150kW ne-torque engu-500Nm.
Enye inhlobo inamandla afanayo kodwa umehluko wukuthi ine-48V mild-hybrid system.
Enye abangayifaka ngekwiHilux GR-S enamandla athe xaxa angu-165kW ne-torque engu-550Nm.
Intengo nayo abazange bathi vu ngayo kodwa kulindeleke ukuthi ilinganiselwe ngasesigidini samarandi njengoba iLegend intengo yayo iqala kuR859 200 kuthi iGR-S yona ibize uR999 000.
Sizolithola ithuba lokuyibonela eduze nokuyishayela bese sibuya nombiko ophelele ngayo.