Kuqhakaza imibala ezothile enemihlobiso emihle kulobu busika

NGENGOBA sebuqalile ubusika, kuningi abantu besifazane okumele bakuhlele ngobuhle babo, kulokhu sibheka imibala nezitayela ezinhle zezinzipho.

Kungakhathalekile ukuthi ungumuntu osebenzayo noma ozihlalela ekhaya, kodwa kuhle ukuqikelela ukuthi izandla nezinzipho zakho kuhlezi kunakekelekile. Akuyi ngobuhle kuphela, kodwa izinzipho ezenziwe kahle ziqhakambisa ubuwena, isitayela sakho nokuyinto ekhombisa ukuzithanda futhi ube nokuzethemba.

Ubusika baziwa kakhulu ngemibala ezothile, amajazi ansundu, amnyama noma abovu. Kodwa-ke abaningi basuke bebhekelele kakhulu ukufudumala kunokulandela isitayela nefeshini, yingakho kubalulekile ukuthi izinzipho zakho zixoxe indaba egcwele ngawe ngokwemibala oyikhethayo kanjalo nendlela ozihlobisa ngayo.

Izazi zesitayela zithi imibala ezothile iyona evame ukudlisa ebusika, kodwa kulo nyaka izinto zishintshile njengoba kwanda kakhulu imihlobiso egqamile yezimbali, ama-glitter. Kubuyiswe nesitayela iFrench manicure esishaya ngemibala ehlukene.

UTiny Dlamini ongumnikazi weSorbet Salon eDurban North uthi i-soft gel iyona ehamba phambili kulobu busika. Izinzipho zejeli ezithambile zinhle ebusika, zibukeka kahle njengezinzipho zakho zemvelo kunejeli eqinile noma i-acrylic.

"Abantu abaningi benza lolu hlobo lwejeli ngombala ozothile o-burgundy (obomvu ngokujiyile) uhlotshiswe ngezinkanyezi ezimbalwa ngezansi kozipho. Lo mbala uzothile, uhambisana nanoma yini oyigqokayo," kusho yena.

Uthe lolu hlobo lufanele abantu abanesikhumba esithambile nesinamafutha abangadingi ukugcoba izandla njalo ngoba ijeli iyashesha okonakala uma umuntu ezixina ngokokugcoba.

AbePassion Beauty Salon babona isitayela sezinzipho ezenziwe nge-acrylic sidlisa kakhulu ngalesi sikhathi ngemibala egqamile nemihlobiso emincane. Izitayela ezidumile zifaka izinzipho ezimfushane, umumo we-alimondi, namaphalethi ombala ahlukahlukene afana nobomvu be-cherry, abamnyama bakudala, nokuhlaza okwesibhakabhaka.

Abanesikhumba esomile, kuhle benze i-acrylic ngoba iqinile, ngeke iphazamiseke uma ugcoba njalo izandla.

Amasu okunakekela izinzipho zakho ebusika

Isimo sezulu sasebusika singomisa izinzipho zakho nama-cuticles. Landela lamasu ukuze ugcine i-manicure yakho ingenasici:

• Gcoba izandla zakho kanye nama-cuticles njalo ngokhilimu noma amafutha okuthambisa.
• Gwema ukusebenzia kakhulu amanzi ashisayo ngoba azothambisa izinzipho zakho zilimale kalula.
• Sebenzisa i-basecoat ukuze uvikele izinzipho zingangcoli kalula futhi zihlale ziqinile.
• Gcoba i-topcoat ukugcina umbala ucwebezela futhi uvimbele ukuqhekeka.
• Gqoka amagilavu ​​uma ungaphandle ukuze uvikele izinzipho emakhazeni nasemoyeni.
• Ungakhohlwa ukuphatha kahle izinzipho zakho zizohlala zizinhle isikhathi eside.