Kutshalwe u-R854 000 emakethe eheha abavakashela eSimangaliso
KUSUKELA kwesokunxele yiNduna uMnuz Almon Sithole, uNkk Nomusa Mthembu, yisikhulu esiphezulu seSimangaliso Wetland Park uMnuz Sibusiso Bukhosini noMnuz Simon Malete weGlobal Environment Facility ngenkathi kuvulwa ngokusemthethweni iSiyazama St Lucia Market Primary Cooperative, eseSt Lucia, enyakatho yeKwaZulu-Natal kuleli sonto
Image: SIMANGALISO NTSHANGASE
KULINDELEKE ukuthi iqhubeke nokudoba inqwaba yezivakashi ezisuke zivakashele iSimangaliso Wetland Park, imakethe iSiyazama St Lucia Market Primary Cooperative, esenkabenii yedolobha iSt Lucia, enyakatho yeKwaZulu-Natal, esilungiswe kabusha.
Lokho kungenxa yokwethulwa kwayo isilungiswe kabusha ngabeSimangaliso Wetland Park, bebambisene nohlaka oluxhasa amabhizinisi nezinhlelo zokongiwa kwemvelo iGlobal Environment Facility, kuleli sonto - okudalulwe ukuthi kudle imali engaphezu kukaR854 000 ukuyilungisa, kwafakwa izinsiza kusebenza ezintsha - kubalwa nemikhiqizo edayiswa khona.
Isikhulu esiphezulu seSimangaliso Wetland Park, uMnuz Sibusiso Bukhosini, sithe besikhathazeka njalo uma sidlula eduze kwale makethe sibona omama abazidayisela kuyona bepatanisa ukuthengisa imikhiqizo yabo, esimeni esingesihle abasebenza kusona.
ISIBUKEKA kanjena iSiyazama St Lucia Market esilungiswe kabusha
Image: SIMANGALISO NTSHANGASE
"Yilokho okwenze safisa ukuthi kube khona esikwenzayo ukubalekelela kulo msebenzi wabo wansuku zonke, ebesibona ukuthi uwusizokangakanani ezivakashini ezisuke zilana endaweni yethu - okuthi uma zisekhona, zidlule njalo kule makethe zithenge imikhiqizo ehlukene edayiswa kuyona. Kanti futhi sithemba ukuthi njengoba isilungisiwe kanjena izoqhubeka yenze umehluko kubadayisi bakhona baqhubeke baziphilise," kusho yena.
Omunye wabadayisi abangaphezu kuka-20 abadayisa kule makethe, uNkk Nomusa Mthembu, uthe bajabule kakhulu ngokuthi ekugcineni sewuze wafezeka umbono wabo wokuthi indawo abasebenzela kuyona ibe sesimeni esifanele nesinesithunzi ukuze basebenze ngokuthula.
ISIBUKEKA kanjena iSiyazama St Lucia Market esilungiswe kabusha
Image: SIMANGALISO NTSHANGASE
"Bese kuyisikhathi eside kakhulu sisebenza esimeni esngagculisi njengoba bekuthi uma kuna imvula sinethwe, konakalel nemikhiqizo esiyidayisayo - kanti futhi kusithobisa kakhulu ukuthi siqala nokuxhaswa, sisizakale ngendlela esezingeni eliphezulu kangaka. Lokhu kuzosikhuthaza kakhulu ukuqhubeka senze lo msebenzi owusizo kakhulu empilweni yethu nasekutheni siziphilise nemindeni ebheke thina," kusho uNkk Mthembu.
Induna eyakhele le ndawo, uMnuz Almon Sithole, eyayikhona kuqalwa imakethe eminyakeni engaphezu kuka-30 edlule, ithe ifikelwa umuzwa womunyu uma ibheka lapho besuka khona ngalo msebenzi, njengoba le makethe isiphuculwe kangaka. Uthe selokhu yaba khona ilokhu iwusizo emindenini eminingi esizwa yinzuzo eyenziwa ngayo.
UBukhosini uthe abazukuphelela kulokhu njengoba kungeminye yemigomo yabo ukuthi bahlale bephosa esivivaneni ukuxhasa osomabhizinisi abehlukene abasafufusa, ikakhulu uma imisebenzi emihle abayenzayo izosiza ukuheha izivakashi zijabule uma zize epaki.