Kusosizakala abafundi nothisha ngomnikelo wezikebhe zeSimangaliso
IZIKEBHE ezintsha ezizoba wusizo kubafundi nakothisha baseMadlangula, eManguzi, enyakatho yeKwaZulu-Natal
Image: SIMANGALISO NTSHANGASE
UZOBA wusizo ezinganeni zesikole nakothisha umnikelo wezikebhe eziyisithupha owenziwe ngabendawo yezemvelo neyisigcinamagugu esizwe iSimangaliso Wetland Park, Ezemvelo KZN Wildlife naboMnyango weMfundo eyiSisekelo KwaZulu-Natal.
Lokho kuhlaluke emcimbini wokwethula ngokusemthethweni izikebhe kubagwedli bazo abathathu obuseKosi Bay Campsite - eholwa yibona abeSimangaliso kule ngxenye yaso eseMadlangula, eManguzi, enyakatho yeKwaZulu-Natal ngoLwesine.
Isikhulu esiphezulu seSimangaliso Wetland Park, uMnuz Sibusiso Bukhosini, sithe lokhu abakwenzile kuyinhloso yabo yokuveza ukuthi bawukhathalele kangakanani umphakathi nokuthi kubonakale ukuthi abagxilile ekuqhakambiseni ezokuvakasha kuphela.
ISIKHULU esiphezulu seSimangaliso Wetland Park uMnuz Sibusiso Bukhosini, isikhulu esiphezulu se-Ezemvelo KZN Wildlife uMnuz Sihle Mkhize neNhloko yoMnyango weMfundo eyiSisekelo eKZN uDkt Nkosinathi Ngcobo benikela ngezikebhe eziyisithupha ezizoba wusizo kubafundi nothisha baseMadlangula, eManguzi, enyakatho yeKwaZulu-Natal
Image: SIMANGALISO NTSHANGASE
"Sifisa kubonakale nokuthi siyikhathalele kangakanani inhlalakahle nentuthuko yomphakathi esiwakhele, futhi kusemkhondweni wethu ukuthi kukho konke nje esikwenzayo siqikelele ukuthi umphakathi wethu uba nendlela ohlomula ngayo, njengoba kwenzeka ngalaba esibaxhase ngalezi zikebhe ngoba bazokwazi ukuqhubeka benze lo msebenzi bekhululekile, futhi benze inzuzo yokuziphilisa ngokwabo," usho kanje.
Abahlomule ngezikebhe woMnuz Victor Ngubane, Eugene Tembe noThokozani Cele; kanti nangaphezu kwalokho kukhona nolunye uhlelo oluqhubekayo oluhambisana nalolu lokwakhiwa kwezindlu ezingomahambenendlwana, ezizosetshenziswa yizivakashi ezizobe zivakashele kule ndawo ukuzogibela izikebhe nokungcebeleka.
"Lolo hlelo nalo sizoluphothula maduze njengoba seluvele lukuvuthondaba manje ngenxa yemali engaphezu kwaR10 million esiyitshale kulona ukusiza ukuthi labo somabhizinisi bawenze kahle umsebenzi wabo wokujabulisa abantu ngeziklebhe," kusho uBukhosini.
Inhloko yoMnyango weMfundo eyiSisekelo KwaZulu-Natal uDkt Nkosinathi Ngcobo, ithe kubajabulise kakhulu lokhu okwenzekile ngoba kuzoba wusizo kakhulu kothisha, kanjalo nasezinganeni ezihlale ziwela lomfula ukuya esikoleni nsuku zonke.
"Bekusikhathaza ukuthi bekunesikebhe esisodwa esisiza izingane zesikole nothisha ukuwelela ngaphesheya, obekuthi uma sinenkinga baphoqeleke ukuthi bawele kanzima behamba ngezinyawo, baze baphathe nezimpahla zokushintsha - obekwenza ukuthi bahlukumezeke kakhulu futhi behlelwe nayisithunzi ngenxa yalesi simo. Ngakho-ke sithemba ukuthi lokhu kuzobakhuthaza ukuzimisela emsebenzini nasesikoleni," kusho uDkt Ngcobo.
UTembe wenkampani i-The Bush Lifestyle, ongomunye wabathathu abahlomule ngalezi zikebhe, uthe lokhu kuzosiza kakhulu ukwenza umsebenzi wabo ube lula, futhi bazibophezele ukubeka eqhulwini ukuphepha kwawo wonke umuntu abamgibezayo.