Ushaya ngoshuni omusha owayengumholi we-EFF

UNGENA uyagamanxa kwezobuciko owayesebuholini be-Economic Freedom Fighters (EFF), uMbuyiseni Ndlozi, njengoba esekhiphe i-albhamu yomculo.

UNdlozi ubeyilungu lePhalamende le-EFF kusuka ngo-2014, wasula ngasekuqaleni konyaka. Kusuka lapho, uphenduke umsakazi ngoMashi, ejoyina isiteshi sezingxoxo esizinze eGoli, iPower FM.

Wethula uhlelo iPower Talk ngo-9 ekuseni kuya ku-12 emini ngoMsombuluko kuya kuLwesihlanu.

Ngo-Agasti, umenyezelwe njengomethuli we-African Renaissance Podcast yeThabo Mbeki Foundation edlala kwiYoutube.

Njengamanje usengene shi emculweni njengoba ekhiphe i-albhamu ethi Usizi enezingoma eziyisishiyagalolunye.

Kuyona ucula Igwijo.

“Ngaphansi kwamahora angu-24, #Usizi luphume, luhlale kunombolo 98 ohlwini lwama-albhamu ahamba phambili kwi-Apple Music eNingizimu Afrika. Ngiyabonga bantwana beNkosi,” kusho uNdlozi kwi-X.

Ilokhu iqhubeka nokunyuka njengoba ngempelasonto ibisisendaweni ka-38.

Uthe kade aqala ukuthanda ukucula nabantu nokubaculela yingakho ekhiphe i-albhamu.

Ngesikhathi eseyilungu le-EFF, wagqama nangokucula ingoma ethi Azania emibuthanweni yeqembu.

UNdlozi akayena yedwa owayeyilungu le-EFF ePhalamende elisemculweni.

Maphakathi konyaka odlule, uRingo Madlingozi wamemezela ukuthi ipolitiki ngeke isaba seqhulwini empilweni yakhe.

Ubuyele emculweni, kwathi ngo-Ephreli, wakhipha i-albhamu ethi Ikhwelo enezingoma ezingu-15.