Luzophathwa yimbokodo uhlelo kumaCrown Gospel Music Awards
UMMATEMA uzophatha uhlelo kumaCrown Gospel Music Awards azoba se-ICC eThekwini ngeSonto
Image: Instagram
IZILOMO zabaculi zizoshiyelana inkundla kumaCrown Gospel Music Awards uhlelo lwawo oluzophathwa ngabesifazane bodwa okokuqala ngqa eNkosi Albert Luthuli International Convention Centre (ICC) eThekwini, ngeSonto.
AmaCrown, okuzoba ngaka-18, abuyela eThekwini okokuqala emuva kokushona komsunguli wawo uZanele Mbokazi owathathwa wukugula ngonyaka odlule.
Kule minyaka emibili edlule abeba seGoli.
Uhlelo luzophathwa wuMmatema noMillicent Mashile nokuzoba ngokokuqala ukuthi luphathwe ngabesifazane bodwa. Ngokudlule bekuxuba kuba ngowesilisa nowesifazane okanye kube ngowesilisa yedwa.
Kwabazonandisa kubalwa uSindi Ntombela, Dumi Mkokstad, Umlazi Gospel Choir Original, uNothando Hlophe noSphiwo Ndoni baseSwatini nabanye.
Imenenja yamaCrown, uNonjabulo Mdluli, ithe kusuka ngo-4 ntambama balindele ukuthi izicukuthwane zibe seziqala ukunyathela kukhaphethi obomvu.
Ubale ukuthi balindele abaphathiswa, undunankulu waKwaZulu-Natal nabanye abaholi.
“Siyajabula ngokuheha nezimenywa zangaphandle kweTheku ezikhuphula izinga lezokuvakasha KwaZulu-Natal. Lokhu kuhambisana kahle nenhloso yethu yokukhombisa ubuhle beTheku kusuka e-ICC kuya kwezinye izindawo ezihehayo,” kusho uNonjabulo.
Abaqokiwe bangaphezulu kuka-400 abazobe bebanga imiklomelo eminxeni engu-25.
Akazange athi vu ngokusakazwa komcimbi kwithelevishini.
Amathikithi asatholakala eWebtickets futhi aqala kuR300.