Kubhekwe izinga eliphezulu kwethulwa abazonandisa kwiMbizo
UMCULI uZawadi Yamungu usemacikweni azovula emcimbini i-The Music Imbizo, e-ICC, eThekwini kule nyanga
Image: SITHUNYELWE
KULINDELEKE ukuthi uqale ngegiya eliphezulu umcimbi waminyaka yonke owumbuthano wezingxoxo zokucobelana ngolwazi lwebhizinisi lwezomculo nobuciko i-The Music Imbizo, ezoba se-ICC, eThekwini ngo-Agasti 26 kuya ku-30 kulo nyaka.
Esitatimendeni esithunyelelwe abezindaba ngabahleli balo mcimbi owaqalwa wuSphe Mbhele ngo-2009, badalule ukuthi konke sekumi ngomumo ngosuku lokuwuvula ngokusemthethweni ngo-Agasti 26 njengoba eseqinisekisiwe wonke amaciko azonandisa.
Nonyaka ingqikithi yomcimbi ithi At The Root of Innovation Is Culture, Creativity and The Power of IP, okusho ukuthi babheke ukuqhakambisa ubuciko, amasiko namandla obuchwepheshe besimanje ukuthuthukisa amaciko azobe ewuhambele.
UMCULI we-soul u-Ayanda Jiya osemacikweni azovula emcimbini i-The Music Imbizo, e-ICC, eThekwini kule nyanga
Image: SITHUNYELWE
"Ngobusuku bokuvula umcimbi sizojatshuliswa wumculi uZawadi Yamungu, okwaziwayo ukuthi umculo wakhe ugxile kakhulu amasikweni nasezingxabweni zamasiko ethu, yingakho ekwabazonandisa kuleyo ngxenye yokuqala yomcimbi okuzobe kuvumeleke ukungena kuyona abamenyiwe kuphela, kwendlalelwa umcimbi wonke," basho kanje.
Kusukela ngo-Agasti 23 kuya ku-30 kuzonandisa amaciko ehlukene ngezinsuku ezahlukene okukhona kuwona isithandwa sabalandeli bakamaskandi uKhuzani, kube wumdlali we-piano kwi-jazz uDkt Sbu Mash Mashiloane, wumculi we-soul u-Ayanda Jiya, uJoliza BhacaSoul, Ofishi abakhulu namaciko akwamanye amazwe oXixel Langa waseMozambique noFaray The Great waseZimbabwe.
UMCULI waseMozambique uXixel Langa osemacikweni azonandisa emcimbini i-The Music Imbizo, e-ICC, eThekwini kule nyanga
Image: SITHUNYELWE
Njengenjwayelo, emcimbini walo nyaka kuzoba nezingxoxo ezahlukene zokucobelana ngamasu okuchuma ebhizinisini lomculo, lokho nonyaka okuzokwenzeka kusuka ngo-Agasti 27 kuya ku-29. Khona lapho futhi kuzoba khona namafilimu azokhonjiswa kube kuqhubeka umcimbi, okukhona kuwona ethi A Journey Back To Heart eyenziwe wumculi we-afro pop uZinhle Madela. Kukhona nekaLex Lafoy ethi The Lexikon 2.0 Project.
I-The Music Imbizo yanonyaka izohlanganisa izikhulumi ezingaphezu kuka-60,amaciko awu-25 nosomabhizinisi abawu-30 abazobe bekhangisa ngemikhiqizo yamabhizinisi abo eyahlukene kube kuqhubeka umcimbi.
UMCULI kamaskandi uKhuzani obalwa kwazonandisa kwi-The Music Imbizo e-ICC, eThekwini kule nyanga
Image: SITHUNYELWE
Kulokhu lo mcimbi, owaqala ngo-2009, uzokhonjiswa bukhoma kwiSABC 1, kanti ugabe ngabaxhasi abehlukene okukhona kubona i-Independent Media, Durban Tourism, CAPASSO, Brand South Africa, SAMRO, TikTok, Bathu ne-NoOx Worldwide yase-Italy.
UMCULI waseZimbabwe uFaray The Great osemacikweni azonandisa kwi-The Music Imbizo, e-ICC, eThekwini nonyaka
Image: SITHUNYELWE
Amathikithi ezigcawu ezithile zalo mcimbi abiza uR250 umuntu ngamunye eWebticktes, bese futhi kuba mahhala kwezinye. Ngeminye imininingwane ungangena kwi-website ethi: www.themusicimbizo.co.za.