Kuzoba nenhlolokhono yabalingisi kubuya iSoul City

I-SOUL City Institute for Social Justice isiqale amalungiselelo okubuya kwithelevishini ngohlelo olusha iShayindlela (Turn the Tide), okuzokwenziwa inhlolokhono yabalingisi balo eThe Market Theatre, eGoli, ngoLwesihlanu nangoMgqibelo.

ISoul City izakhele udumo ngohlelo olwadlala iminyaka kwithelevishini, olwaluqwashisa ngezinto ezahlukene okubalwa kuzo igciwane ingculaza, ukusetshenziswa kwezidakamizwa nokunye.

Yayigabe ngabalingisi abaphenduke izilomo okubalwa kubo uLillian Dube, Connie Ferguson, Patrick Shai, Nandi Nyembe, Menzi Ngubane nabanye.

Le nhlangano isimemezele ukuthi uhlelo olusha iShayindlela, luzobe luqwashisa ngokuhlukunyezwa kwabantu ngokobulili. Luzobe lugqugquzela ushintsho emphakathi ukugwema udlame olubhekiswe kwabesifazane nasemantombazaneni.

Isikhulu esiphezulu seSoul City Institute, uPhinah Kodisang, sithe lokhu kungaphezu kokubuya kohlelo olufundisayo kodwa yisiqalo sokushintsha isihlava sokuhlukumeza eNingizimu Afrika.

“Ngokwesekwa yiFCDO (UK Foreign, Commonwealth and Development Office) ngokohlelo lweWhat Works II, siyakwazi ukuletha iShayindlela hhayi kwithelevishini kuphela kodwa nasemakilasini, emphakathini nasemakhaya. Lolu hlelo luphonsela inselelo udlame oludlangile lwangokobulili, lweseka abazali futhi luthuthukisa amantombazane lusebenza nabafana ukwakha imiphakathi ephephile kuwo wonke umuntu,” kusho uPhinah.

Uthe umkhankaso usuqalile futhi uzokwethulwa Ekurhuleni kule nyangangokubambisana noMnyango wezeMfundo eGauteng.

Uhlelo lwethelevishini luzoba yiziqephu ezingu-13, luzoqala ngonyaka ozayo.

Ekupheleni kwesonto kuzoba nenhlolokhono yabalingisi abafuna ukuba yingxenye yalo. Izoba seMarket Theatre ngoLwesihlanu nangoMgqibelo phakathi kuka-9 ekuseni no-4 ntambama.

Kuthungathwa abalingisi besifazane abaneminyaka ephakathi kuka-17 no-24, abakhuluma IsiZulu, Sesotho noma iTshivenda. Kumele bazinze eGauteng.