Ushintsho oluncane ngeNgoma Ehlukanisa Unyaka yoKhozi FM

KWENZIWE izinguquko ezimbalwa emikhankasweni yamaholidi kaDisemba yoKhozi FM ehlanganisa umkhankaso weNgoma Ehlukanisa Unyaka.

Engxoxweni ekhethekile neSolezwe, umphathi wesiteshi uLwazi Mthabela, uthe ukuvotela izingoma ezithandwayo ezingase zihlukanise unyaka kuzoqala kusasa.

Phambilini abalaleli bebededelwa ukuthi baphakamise abazithandayo bese kucelwa abasakazi ukuthi benze okufanayo ngaphambi kokuyobhekwa ukuthi ziyadlalwa yini emsakazweni.

Evela ohlwini lwabalaleli, olwabasakazi nolomshini ibikhethwa ukuthi ibe kwi-Top 10.

Kusasa isiteshi sizomemezela ezingu-20 ezihamba phambili bese abalaleli bephakamisa kuzo abazifuna kwi-Top 10.

Kuzovotwa kusuka ngoLwesihlanu kuze kube wuNovemba 26.

Kuzothi kusuka ngoDisemba 1 kuya emini ngoDisemba 31 kuvotelwe iTop 10.

UMthabela uthe lokhu bakwenze belandela izeluleko abazitholile kubacwaningi-mabhuku.

Uthe izingoma okuzokhethwa kuzo ngezangoJanuwari 1 nonyaka kuya ku-Okthoba 31.

Udalule ukuthi babheke izingoma ezihamba phambili ezinhlelweni zomculo njenge-Top 20 neChillas, babheka emshinini wabo wokudlala umculo iDira base bemukela neziphakamiso zabasakazi ngaphambi kokuhambisa kubacwaningi mabhuku ukuthi babalekelele.

“Sithe thina sicela nisikhethele ezingu-20 ezihambe phambili ezingomeni eziphakanyiswe lapha, basibhekela ukuthi yonke into ihambe kahle lapho. Sibuyile sazobheka emishinini ukuthi ingoma idlalwe ngesikhathi esikaliwe yini sabheka nokuthi idlale kangaki onyakeni ngoba nalokho kubalulekile sase sibheka nokuthi ingoma idume kanjani ezinkundleni zokuxhumana njalo njalo,” kusho uMthabela.

Uthe njalo bazobe bekhipha uhla lwezivotelwe kakhulu futhi abalaleli abavotayo bazibeka ethubeni lokuwina imali njengoba beno-R200 000.

Umculi ozobaqwaqwada emakhanda uzohlabana ngeVW Polo TSI entsha ceke athe izoba semsakazweni kusuka kuDisemba 1 abantu bayibone.

Noma enqabile ukudalula abasakazi abazohlukanisa unyaka kodwa uthe ukholwa wukuthi abalaleli bazobathokozela.

Ngonyaka odlule kwakuwuMafresh noSelbeyonce.

“Sizama ukunikeza wonke umuntu ithuba,” kusho uMthabela.

Uthe okunye abazokwenza ngamaholidi wukubuyisa iSiyayijika Lento lapho bethatha khona abasakazi babanikeze izinhlelo abangajwayele ukuzisakaza.

“Sizoyenza ngezindlela ezihlukene iSiyayijika. Sizoletha abantu abaqhamuka ezindaweni ezihlukene njengasezinkundleni zokuxhumana, abakwithelevishini nakwezinye izindawo. Esikufunayo wukuthi kudlalwe kube mnandi. Sibone uLady D, ukwenza isibonelo, ethula uhlelo lwe-hip hop okuyinto engajwayelekile. Yisikhathi sokuphumula ngoba vele ngoDisemba kusuke kudlalwa uwumculo kakhulu,” kuchaza uMthabela.