UMngqithi unemibuzo ngokuxoshwa kukaHunt kwiDurban City
UMQEQESHI weLamontville Golden Arrows, uManqoba Mngqithi noGavin Hunt osanda kukhonjwa indlela kwiDurban City
Image: Isithombe:BACKPAGEPIX
UMANQOBA Mngqithi ongumqeqeshi weLamontville Golden Arrows ubona beshaye isikhala omakhelwane, iDurban City, ngokuxosha uGavin Hunt akholwa wukuthi ubeza kahle emsebenzini wakhe.
Ekuqaleni kwesonto, iCity imemezele ukuthi seyihlukene noHunt ngenxa yokungenami ngendlela iqembu eliyithathayo phezu kokuba ekhonjwe indlela lisendaweni yesishiyagalombili kwi-log yeBetway Premiership. ICitizens inyukele kwiPremiership ngesizini edlule ngemuva kokuwina isicoco seligi yeMotsepe Foundation Championship.
Ekhuluma emuva kokuthi i-Arrows ishaywe ngaMaZulu ngo 1-0 koweligi eKing Zwelithini Stadium, eMlaza, uMngqithi uthe akaqondi ukuthi kungani abaphathi beCity beqoke ukumxosha uHunt.
“Ngokubona kwami uGavin ubesenza kahle kwiDurban City futhi unike ithuba abadlali abaningi abasebancane abadlala kahle nabebedlala kahle ngisho iqembu lisekwiNFD (Motsepe Championship).
Ngisho nendawo abakuyona kwi-log yinhle ekubeni beyiqembu elibuya kwiNFD. Ngakho ngiyazibuza ukuthi yini ezolandela kuleli qembu. Uma bebengawuthakaseli umsebenzi wakhe umbuzo uthi bayafuna yini ukubona inqubekela phambili ekudlaleni kwabo.
Kodwa-ke angehluleli qembu, ngibeka nje umbono wami ngendlela engiyibona ngayo iPSL kule sizini,” kusho uMngqithi.
ICity ithembise ukuthi izosebenzisa ikhefu le-Africa Cup of Nations (Afcon) ukuthungatha umqeqeshi ozovala isikhala sikaHunt. Kubaqeqeshi okungenzeka bathushuke kuleli qembu kukhona u-Ernst Middendorp ohlukane nalo ezinyangeni ezedlule ekade eyi-Technical Director. UMiddendorp uhambe kwiCitizens engasahoshelani noHunt.