UKlate ubona iCity ingamelana nePirates
INKAKHA ye-Orlando Pirates esiqeqesha iqembu elincane leDurban City uDaine Klate.
Image: BACKPAGEPIX
INKAKHA ye-Orlando Pirates, uDaine Klate, ikholelwa ekutheni iDurban City izobe ikulungele ukulwa emdlalweni weBetway Premiership ezowudlala neZimnyama ngoMgqibelo.
La maqembu azodudulana eMoses Mabhida Stadium eThekwini ngo-3.30 ntambama.
IPirates izofika eThekwini ishisa kwazise isinqobe imidlalo eyisishiyagalombili, yadlala ngokulingana kowodwa kweyisishiyagalolunye yeligi yakamuva.
Leli qembu lase-Orlando lisendaweni yesibili kwi-log ngamaphuzu angu-25 emidlalweni engu-11. Linamaphuzu alinganayo neqembu eliqhwakele, iMamelodi Sundowns, eselidlale umdlalo owodwa ngaphezulu.
ICity yona ihlezi endaweni yesikhombisa ngamaphuzu angu-19 emidlalweni engu-13 futhi izobona lo mdlalo njengethuba lokuncintisana nelinye lamaqembu ahamba phambili kwiligi yakuleli.
UKlate, owanqoba izicoco eziningi esadlala kwiPirates futhi oseqeqesha iqembu leDurban City elidlala kwiDStv Diski Challenge, ubona lo mdlalo uyithuba lokukhuphula izinga.
"Sinomdlalo omkhulu esizowudlala ne-Orlando Pirates. Ngicabanga ukuthi kuba wumdlalo omkhulu kunoma yiliphi iqembu uma libhekene neqembu elikhulu njengePirates eThekwini. Nganqoba izicoco nayo iPirates eMoses Mabhida Stadium ngakho-ke ngicabanga ukuthi kuzoba umdlalo omnandi," kusho uKlate engxoxweni nethimba labezindaba leCity.
“Angicabangi ukuthi abadlali bethu badinga ukugqugquzelwa uma bezodlala namaqembu anjengalawa. Inkundla izobe igcwele kuthi kunomsindo omagalisayo. Sonke siwubheke ngabomvu lo mdlalo omkhulu.”
UKlate uthe nakuba bazi ukuthi umdlalo uzoba nzima kangakanani kodwa uyabathemba abadlali beCity ukuthi bazobe bewulungele.
"Kunzima ukudlala nelinye lamaqembu ahamba phambili kuleli njengamanje. Ngokwami, ngicabanga ukuthi sizobe sizilungiselele kahle. Abadlali bazozimisela njengoba bezodlala nePirates,” kuqhuba yena.
“Nginesiqiniseko sokuthi bazobe bezilungiselele ngokomqondo ukumelana nenselelo esizobhekana nayo. Silindele umdlalo omuhle.”
La maqembu azobe ebhekana okokuqala njengoba iCity ikhuphukele esigabeni esiphezulu ekuqaleni kwale sizini.