Richards Bay FC (0) 1
Durban City (0) 0
IRICHARDS Bay FC iwulungiselele ngesitayela umqhudelwano weMTN 8 iwina iKZN Premier’s Cup ngokuguqisa iDurban City kowamanqamu ngeSonto eMhlathuze Sports Complex, eRichards Bay.
Igoli enqobe ngalo iRichards Bay kulo mdlalo wamanqamu kube yiphenathi evalelwe phakathi uTshepo Mabua ngomzuzu ka-90, sekusele kancane kukhale indweba yokuphela komdlalo.
IRichards Bay beyidlulele kowamanqamu ngokuguqisa iMidlands Wanderers ngo 4-3 sekukhahlelwa amaphenathi kowandulela owaamanqamu emdlalweni obuphele zibambene ngo 1-1. ICity ibifinyelele kowamanqamu ngokuguqisa AmaZulu FC ngo 3-2.
Womabili la maqembu alungiselela ukuqala kwesizini, awabagodlanga abadlali bawo abamqoka okuyinto ebilindelekile kuwona njengoba isizini yePremier Soccer League (PSL) izoqala ngesonto elizayo ngo-Agasti 9.
IBay ezodlala okokuqala kwiMTN8, ayikhombisanga ukusinisa amahleza kwiPremier's Cup, isebenzisa abadlali bayo abamqoka ebivele idlala ngabo ngesizini edlule okubalwa kubona nesanda kubasayinisa okunguGabadinho Mhango, Sandile Zuke nabanye.
Kube ngesifanayo nakwiCity edlalise abadlali bayo esanda kubasayinisa okubalwa kubona unozinti uFedrick Asare, Brooklyn Poggenpoel noHashim Domingo obedlalela iCape Town City edliwe yizembe kwiBetway Premeiership.
INatal Rich Boyz izodlala neMamelodi Sundowns koweMTN8 eLucas Moripe Stadium, e-Atteridgeville, ngeSonto. Usuthu luzodudulana neStellenbosch FC eCape Town Stadium, eKapa, ngalo iSonto koweMTN8.