Kungase kugqabuke igoda kuHunt neDurban City

IBHANTSHI lingase ligcwale umoya kumqeqeshi weDurban City, uGavin Hunt, njengoba kuvela ukuthi izikhulu aziseneme ngokugqoza kwemiphumela kuleli qembu eliyiqale ngonyawo oluhle isizini ka-2025/26.

ICity ishaywe yi-Orlando Pirates ngo 2-0 emdlalweni weBetway Premiership ngoMgqibelo eMoses Mabhida Stadium, eThekwini. Kungenzeka ukuthi bekuwumdlalo wokugcina kaHunt esebhentshini leCity. 

Ngokusho komthombo osondelene kakhulu naleli qembu, uHunt kulindeleke ahlangane nabaphathi beqembu lungakashayi uLwesibili, kunqunywe ngekusasa lakhe.

UHunt uthathe izintambo zokuqeqesha leli qembu laseThekwini ngaphambi kokuqala kwesizini emuva kokuxoshwa kukaSimo Dladla obelikhuphulele kwiPremiership ngokudla isicoco seMotsepe Foundation Championship.

“Abaphathi beqembu abaseneme neze ngemiphumela yakamuva egqozayo. Empeleni baqala ukushaya amakhala ngemuva kokuhlulwa yiRichards Bay FC kuma-quarterfinal eCarling Knockout. Wabizelwa emhlanganweni ophuthumayo ngemuva kwalowo mdlalo, abaphathi befuna izincazelo ngendlela iqembu elidlale ngayo nangezinye izinqumo zethimba labaqeqeshi emdlalweni.

Empeleni nangaphambi komdlalo weMarumo Gallants abawunqobile (ngo 1-0) bedlalela ekhaya, ubesevele enqunyelwe ugwayi katiki ukuthi uma kwenzeka ehlulwa lizogcwala umoya.

Nangaphambi komdlalo wangoMgqibelo nePirates, uHunt ubebonakala ukuthi akeneme njengoba ubazi ukuthi ukwehlulwa kwakhe kungase kushayelele isipikili sokugcina ekuxoshweni kwakhe,” kusho umthombo.

Ngokusho komthombo, njengoba iCity izodlalela ekuhambeni ne-Orbit College ngoLwesithathu e-Olympia Park, eRustenburg, kungase kwenzeke leli qembu liye nephini lakhe uPitso Dladla.

Kwenzeka lokhu nje, iCitizens isendaweni yesishiyagalombili kwi-log yePremiership, isahlulwe imidlalo emihlanu, yanqoba emihlanu, yadlala ngokulingana kwemine kwengu-14 esayidlalile ngaphambi kokusonga umzuliswano wokuqala wesizini.

Imizamo yokuthola usihlalo weqembu, uFarook Kadodia, ibhuntshile njengoba ucingo lwakhe belukhala lungabanjwa nomlayezo athunyelelwe wona kuze kwashaya isikhathi sokushicilela engawuphendulanga.