UNOZINTI weKaizer Chiefs osekuphele izinyanga eziyisikhombisa limeqa engalimele ijezi, uFiacre Ntwari waseRwanda, ulokhu eqhubekile nokuzidayisa buthule emaqenjini okuvela ukuthi ayameshela njengoba kusobala ukuthi umqeqeshi waMakhosi, uNasreddine Nabi, akayizwa indaba yakhe.
Nakuba iRwanda ikhale ngaphansi ngo 2-0 kwi-Algeria kowobungani ngoLwesine eMohamed Hamlaoui Stadium, uNtawri uwudlale wonke umdlalo. Bekungokwesihlanu kulezi zinyanga eduvile kwiChiefs kwazise iqembu lakhe lesizwe alikaze limlahle.
Kungenxa yale midlalo ayidlala kwelesizwe lo nozinti njengoba sekuqala nokuvela amaqembu amnyonyobelayo kumamaligi ehlukene.
Lo nozinti owafika kwiChiefs enesithunzi esuka kwiTS Galaxy, wagcina ukubonakala enkundleni ngasekuqaleni kukaNovemba nyakenye emdlalweni weCarling Knockout osekungumlando ukuthi Amakhosi atitinywa kuwona yiMamelodi Sundowns ngo 4-0.
Isizini edlule iqale kubukeka sengathi uyena okhonyayo embangwnei wejezi okufakazelwa wukunikwa kwakhe ijezi emidlalweni emihlanu yokuqala yeBetway Premiership.
Akwaziwa okwaholela ekutheni agcine engasabhekwa nguNabi phezu kokuba uBruce Bvuma ubenza amaphutha imidlalo ilandelana. UNtwari oneminyaka egu-25 akakaze aphinde abonakale enkundleni kwiChiefs kwazise ijezi bese kungelikaBvuma ngaphambi kokuthi naye aphucwe.
Kowamanqamu weNedbank Cup osekungumlando ukuthi iChiefs iwunqobe kuvimbe uBrandon Petersen, uNtwari esebhentshini.
Yize kusobala ukuthi lo nozinti waseRwanda akekho enhliziyweni kaNabi kodwa u-Adel Amrouche owumqeqeshi wakhe eqenjini lesizwe ulokhu emile ngaye ezintini.
“Ngiyazi ukuthi uNtwari usenenkontileka neChiefs kodwa angisiboni isidingo sokumgquma ekubeni ingamsebenzisi ngoba lokhu kubulala ikusasa lakhe,” kusho u-Amrouche emasontweni adlule.
“Ithalente kuNtwari lisobala uma ubheka indlela onozinti osekufanele balidlale ngayo ibhola kodwa uzitshwa ekhona okuyinto engishiya nombuzo wokuthi wayethengelwani.
“Abanye abaqeqeshi ngabe abamdlalisi kwelesizwe ngoba kwiChiefs uhlala ebhenthini kodwa ngenxa yamagalelo akhe ngeke ngiyeke ukumsebenzisa eqenjini lesizwe leRwanda ngoba siyamdinga."
Okuchaza kakhulu u-Amrouche ukuthi ngokwazi kwakhe amaqembu aseFrance, Saudi Arabia nelaseKhakhstan asiqaphe ngeso lokhozi isimo sikaNtwari kwiChiefs.