Abasiki bengqephu bazomela iTheku kowezemfashini eNamibia
UMNUZ Thami Ngubeni ephahlwe ngabakhangisa ngemisiko yakhe athole ithuba lokuyokhangisa ngayo embukisweni wemfashini ozoba seNamibia ngenyanga ezayo
Image: SITHUNYELWE
UMASIPALA weTheku usalokhu uqhubeke njalo nokuqhakambisa imboni yezemfashini nokusiza ukuchumisa abasiki bengqephu, njengoba sekuqale amalungiselelo ezinhlelo zohambo lwabasiki bengqephu ababili baseThekwini abazolimela embukisweni i-MTC Windhoek Fashion Week, ozoba seWindhoek, eNamibia, ngenyanga ezayo.
Labo ngoMnuz Mzwandile Mathonsi, odle umhlanganiso ethola umklomelo iDurban Designer of The Year ngemisiko yenkampani yakhe iZWANDYY noThami Ngubeni odle umhlanganiso ewina iBest Menswear Collection Award ngemisiko yasenkampanini yakhe iMonarch Detailer. Bahlabane ngale miklomelo kumaDurban Fashion Fair Recognition Awards abeseDurban Exhibition Centre ngenyanga edlule.
UMSIKI wengqephu uThami Ngubeni uthole ingqayizivele yethuba lokuyokhombisa imisiko yakhe embukisweni wemfashini ozoba seNamibia ngenyanga ezayo
Image: SITHUNYELWE
Kwi-MTC Windhoek Fashion Week, ezoba ngoNovemba 5 kuya ku-8, enxanxatheleni yezitolo iMaerua, bazothola ithuba lokukhangisa imisiko yabo eyehlukene ebantwini basemazweni ehlukene omhlaba.
IMISIKO yenkampani iZWANDYY kaMnuz Mzwandile Mathonsi, azodlisa ngayo embukisweni wezemfashini ozoba seNamibia ngenyanga ezayo
Image: SITHUNYELWE
UMathonsi noNgubeni bacijwa ohlelweni lwe-DFF Mentorship Programme, oluhlelwa wuMasipala weTheku minyaka yonke ngenhloso yokuthuthukisa abasiki bengqephu abasafufusa ukuze bachume kule ndima, futhi bathole namathuba okufukula amabhizinisi abo.
IMISIKO yenkampani iZWANDYY kaMnuz Mzwandile Mathonsi azodlisa ngayo embukisweni wemfashini ozoba seNamibia ngenyanga ezayo
Image: SITHUNYELWE
Usihlalo wekomiti lophiko lokuThuthukiswa koMnotho nokuHlela eThekwini, ikhansela uThembo Ntuli, uthe bayaziqhenya kakhulu ngokuthi laba basiki bengqephu bazoba yingxenye yethuba eliyingqayizivele kangaka nelizobasiza ukuchumisa imisebenzi yabo.
OMUNYE wemisiko yeMonarch Detailer kaMnuz Thami Ngubeni, azodlisa ngayo embukisweni wemfashini ozoba seNamibia ngenyanga ezayo
Image: SITHUNYELWE
UNgobeni uthe: "Sengivele sengiqalile ukukhetha imisiko engisophe ukudlisa ngayo kulo mcimbi. Ngijabule kakhulu ngethuba lokumela iTheku entweni enkulu kangaka, ngiyazibongela nakuMasipala weTheku ngokungibeka kulesi sigaba sempilo."
OMUNYE wemisiko yeMonarch Detailer kaMnuz Thami Ngubeni, azodlisa ngayo embukisweni wemfashini ozoba seNamibia ngenyanga ezayo
Image: SITHUNYELWE
"Amathuba anjengaleli azosisiza kakhulu ukukhulisa igama kule ndima, kanti kwakuvele kuyiphupho lethu ukuthi sifike kulesi sigaba ngamakhono ethu," kusho uMathonsi.