Ishintshwe indlela ebukeka ngayo iChery Tiggo 7 ithuthukiswa

IMOTO: CHERY TIGGO 7

ENYE yezimoto zakwaChery ezidayiswa kakhulu emhlabeni jikelele iTiggo 7, yenziwe yaheha ngokuthuthukiswa kwendlela ebukeka ngayo.

Ngaphambili bayifake i-grille entsha ecwebezelayo. Okunye enakho ngaphambili ngamaLED headlights.

Uma uqaphela noPro ekugcineni kwegama layo usukhishiwe.

ITiggo 7 ihlukene ngezinhlobo ezintathu okuyiPrime, Prestige neLegacy. KwiPrime uthola amarimu angu-18 inch, dual-zone climate control, ikhamera eveza ingemuva uma upaka nokunye.

Injini ingu-1.5 litre turbo kaphethroli enamandla angu-108kW ne-torque engu-210Nm. U-gearbox uyi-6 speed auto.

Ephakathi nendawo yiPrestige enamarimu angu-19 inch, ikhamera eveza wonke umzimba ngaphandle, izihlalo zesikhumba futhi esomshayeli esihlelwa ngogesi, ambient lighting nokunye.

Injini kuyo ingu-1.6 litre turbo kaphethroli enamandla angu-145kW ne-torque engu-290Nm. U-gearbox uyi-7 speed auto.

Esicongweni kuhleli iLegacy enezihlalo zangaphambili ezifudumalayo, panoramic sunroof, ibhuthi evuleka ngogesi (enesikhala esingu-565 litres kuzo zonke), izipikha zeSony nokunye. Injini iyafana nekwiPrestige.

Zonke izinhlobo zinama-screen amabili angu-12.3 inch okungese-infotainment nese-digital instrument cluster.

Ezokuphepha, okunye okuya ngenhlobo yakho, kubalwa ama-airbag ayisishiyagalombili, iyasho uma uphuma emzileni, iyasho uma uzoshayisa, iyazibhrekela ukugwema ingozi nokunye.

Intengo:

Prime 1.5T - R429,900

Prestige 1.6T - R499,900

Legacy 1.6T - R549,900

Zonke izinhlobo zifika ne-service plan yeminyaka emihlanu noma u-60 000km, warranty yeminyaka emihlanu noma u-150 000km ne-warrany yenjini yeminyaka engu-10 noma u-1 million km etholwa wumnikazi wokuqala noma isekeni ethengwe kwaChery.