Ngeke ulahle ngokulanda iGWM P300 uma unqena adumile

IMOTO: GWM P300

UMA ubheka ukukhonya kweToyota, Ford ne-Isuzu emakethe yamaveni eNingizimu Afrika njengomphathi wenye inkampani ubungashaywa wuvalo ngokuzama ukuncintisana nazo.

Kwa-GWM abayingeni leyo kunalokho baphaka impi ngeP300 esithuthukisiwe.

Empeleni le nkampani inomlando omude ekwakheni amaveni njengoba bake baba neDeer eyethulwa ngo-1996 kanjalo neSteed okiyiyo abantu abaningi abangase bayazi kahle.

Kuthe uma sebethuthukisa iP-Series kulo nyaka ngemuva kwemihlanu yafika kuleli bakhetha ukwenza izinto ngokwehlukile.

Okokuqala wukushintsha igama kwaba yiP300 njengoba ekupheleni konyaka odlule bethule iveni elikhulu iP500. Sekuyahambisana nakumaSUV abo okukhona kuwo iTank300 kanjalo nengqovungqovu iTank500.

Ukushintshwa kwegama akuyona kuphela into abayenzile.

Ngiyakuthanda okwenziwe ngaphambili ngokunciphisa i-chrome kwi-grille.

Igaxwe i-grille entsha esinciphe i-chrome bakushiyela iP500 lokho.

Amalambu angamaLED nawo bawenze kabusha. Njengoba kuyiveni ephakeme, bayifake amastebhisi okugibela okuyinto enhle.

Enye into enhle nengiyithandayo wukuthi kungeneka kalula esikhenkeni uma ulayisha impahla. Phela esivalweni saso kunebhathini phezulu oliciphizayo kuphume isitebhisi sokugibela.

Ngithutha impahla kuvele kwaba lula ukugibela khona. Kuhle futhi ukuthi naphansi esikhenkeni akuklwebheki ngoba kunerabha.

Indaba isuke sengifuna ukubopha umthwalo ngoba izindawo zingaphakathi hhayi ngaphandle kodwa yinto enjalo nakwamanye amaveni ongabala kuwo iNissan Navara.

Uma uyifaka i-towbar bathi ungadonsa isisindo esingu-3 500kg.

Phela namandla enjini bawanyusile mbijana. Injini ingu-2.4 litre turbo kadizili enamandla angu-135 kW ne-torque engu-480 Nm. U-gearbox ucishe ulingane neFord Ranger njengoba wona uyi-9 speed automatic.

Ngiyithatha ngiyifake emgwaqweni ovulekile ngibheke ogwini oluseningizimu sigcwele mfi phakathi.

Ezinye izimpahla sikwazile ukuzifihla ngaphansi kwezihlalo zangemuva ngoba kunesikhala okuyinto enhle.

Emgwaqweni ihamba kahle isezingeni lawo amaHilux ngokungabi yisigqiki emabhampini. Ithule kahle futhi ngaphakathi.

Noma ngingayifakanga obhuqwini kodwa bekungeke kube yinkinga njengoba ine-diff lock kanjalo no-4Low Range.

Kudizili bathi idla amalitha angu-8.0 ngo-100km kimi ibingekho kude kakhulu ngoba ibiphuza 8.7 ngebanga elifanayo.

Kwezokuphepha abayincishanga ngoba iyasho uma iphuma emzileni, iyakuxwayisa uma izoshayisa iphinde izibhrekele, iyasho uma umshayeli esekhathele nokunye.

Uma usupaka kukancane ukuthi ushayise ngoba inamakhamera aveza umzimba wonke kanjalo nama-sensor.

Ngaphakathi ungathi yiSUV ngenxa yendlela eyakhiwe ngayo ikulo izinga lamaHilux namaRanger.

Abagibeli bahlala ezihlalweni zesikhumba ezishisayo ziphinde zibande ezangaphambili. Amakhaza bengiwezwa ngendaba esiteringini ngoba naso siyakwazi ukufudumala.

Bayifake i-touchscreen infotainment system engu-12.3 inch oxhuma kuyo iselula nge-Apple CarPlay/Android Auto iphinde ibe ne-digital instrument cluster.

Umbango wokushaja ubungekho ngoba kunezimbobo zokushaja nge-USB kanjalo neyokushaja ngaphandle kwentambo.

Intengo:

• P300 D-CAB 2.4TD LT 4WD—R649 900

Ifika ne-warranty yeminyaka engu-200 000km, iRoadside Assistance yeminyaka eyisikhombisa ne-service plan yeminyaka eyisikhombisa noma u-75 000km.