Ifike nenqwaba yokusha iHyundai Santa Fe esibiza ngaphezu kwesigidi

IMOTO: HYUNDAI SANTA FE

KWA-HYUNDAI eNingizimu Afrika bethule iSanta Fe entsha eyimoto yabo yokuqala kuleli eyi-hybrid.

Le SUV elayisha abagibeli abayisikhombisa iyimoto yesibili ukubiza ngaphezu kwesigidi samarandi kwaHyundai emuva kwePalisade engu-R1 204 500.

Phambilini kwakudayiswa iSanta Fe eyayinenjini kadizili kodwa kule entsha kulethwe inhlobo eyodwa kuphela eyi-hydrid.

Ihamba ngenjini entsha kaphethroli engu1.6 litre turbocharged kaphethroli enamandla angu-132 kW ne-torque engu-265Nm. Ihlanganiswe nekagesi webhethri elizishajayo enamandla angu-44kW. Uma kusekuhlanganisiwe kunamandla angu-175kW ne-torque engu-367 Nm.

Uma udedela i-accelerator ikakhulukazi ezindaweni ezehlelayo yilapho ibhethri lizishaja khona.

U-gearbox enawo uyi-6 speed auto othumela amandla kuwo wonke amasondo.

Ibhethri bathi liyasiza ukonga kuphethroli njengoba idla 7.5l ngo-100km kanti ungaphamba ngaphezu kuka-1000km ngophethroli osethangini elingu-67 litres.

Indlela abasihambise kuyo yethulwa kuleli sonto, ibigudla lapho kuhamba khona abagijimi beComrades Marathon eValley of a Thousand Hills. Wumgwaqo onamajikajika ukhuphuka koBotha’s Hill udlula eNtshanga ubheke eDrummond.

Ibibambelela ngale kwenkinga kodwa kuzwakala ukuthi uhamba ngemoto enkulu.

Noma bengibuye ngisheshe kodwa ngibone iveza ukuthi idla 8.1l/100km.

Indlela inginike nethuba lokudlala ngama-drive modes ahlukene njengoSport lapho bengizwa isiteringi siba nesisinjwana khona. Amanye u-Eco uma ufuna yonge noMy Drive ofunda indlela oshayela ngayo.

Nezindawo ohamba kuzo uyayitshela ngokukhetha uSand, Snow noma uMud.

Okunye egabe ngakho ngezokuphepha nezinsiza zomshayeli ongabala amakhamera emaceleni akuvezela kwi-instrument cluster ingaphandle uma ufuna ushintsha umzila ungaze ujikise ikhanda ujeqeza kwi-blind spot. Iyakusiza ukuhlala emzileni, inamakhamera aveza umzimba wonke alekelela uma upaka, nokunye.

ISanta Fe entsha okuyinhlobo yesihlanu selokhu yaqala ukwakhiwa sebeyenze yaba yinde kancane kunendala kodwa ububanzi buyalingana.

Igabade ilishiye ngo-177mm okuyinto engaphansi kwendala.

Ngaphandle ibukeka isabhokisi elibukeka kahle ngaphambili. Inamalambu angamaLED nama-daytime running lights amise okukaH ne-grille ekhanyayo okuyenza ibukeke kahle.

Amarimu angu-20 okuhlanganisa nesipele. Ngemuva nakhona amalambu angamaLED futhi amesha wangaphambili ngokumisa okukaH indlela akhanya ngayo. Ingemuva nokho kuzothatha isikhashana ukuthi lijwayeleke.

Ngaphakathi inkulu ivuleke kahle kubagibeli abayisikhombisa. Nesikhala ebhuthini sesisikhulu singu-413 lites okuthi uma ulalise izihlalo sibe ngu-1 148 litres.

Izihlalo lezi ziyisikhumba sokuzakhela.

Inenqwaba yezindawo zokushaja ngaphambili nangemuva okuyinto enhle. Ngaphambili zimbili ezokushaja ngaphandle kwentambo. Okhakhayini ubona isibhakabhaka.

Ngaphambili kune-touchscreen enkulu oxhuma khona iselula nge-Apple CarPlay/Android Auto ngaphandle kwentambo.

Isikhulu sakwaHyundai eNingizimu Afrika, uStanley Anderson, sithe uma bengadayisa angu-10 kuya phezulu ngenyanga sizojabula.

Ezimbangini zayo kukhona iLexus NX, BMW X3, Volvo XC60 nezinye.

Intengo:

Hyundai SANTA FE Hybrid Elite AWD -  R 1 249,900 

Ifika ne-warranty yeminyaka eyisikhombisa noma u-200 000km, i-service plan yeminyaka eyisithupha noma u-90 000km ne-warranty yebhethri yeminyaka eyisishiyagalombili noma u-160 000km.