Okumele ukwenze uma kunoshayisa imoto yakho

Ezinsukwini ezedlule ngithole ucingo kobebuza ukuthi yikuphi okumele akwenze emuva kokuba sengozini.

Uma kucacile ukuthi osephutheni wumshayeli obandakanyeka engozini naye, uyakwazi ukufaka isicelo sesinxephezelo kumshwalense wemoto yakhe.

Lokhu kubizwa nge-3rd Party Insurance Claim kodwa kumele uqoqe yonke imininingwane ukuze kungasali mibuzo.

Abazi ngemishwalense bathi nazi ezinye zezinto okumele uzenze:

• Ubufakazi obukhombisa ukuthi ubungekho ephutheni futhi okushayisile abhale isitatimende esifungelwe esigcizelela lokhu.
• Uma kukhona obonile ingozi yenzeka, thola yonke iminingwane yakhe nenombolo yocingo.
• Yonke imininingwane yomshayeli okushayisile njengamagama, inombolo kamazisi, ikheli lakhe nokunye. Uma kungeyena umnikazi wemoto, thola imininingwane yomnikazi.
• Uhlobo lwemoto ahamba ngalo, izinombolo zayo neVIN.
• Igama lomshwalense wakhe nenombolo ye-Policy.

Imininingwane uya nayo esiteshini samaphoyisa ugcwalise isitatimende esibika ngengozi i-Accident Report okuyinto okumele uyenze engakapheli amahora angu-24. Uma kuwukuthi ubulimele wangakwazi ukuyobika kudingeka incwadi kadokotela.

Uma konke lokhu usukwenzile nakhu okumele ukubheke:

- Thola i-quotation yokulungisa imoto yakho.

- Thinta umshwalense wokushayisile uchaze ukuthi uzofaka isicelo sesinxephezelo ngokwe-3rd party claim bese ubanika yonke imininingwane.

- Abomshwalense bathumela ozohlola umonakalo wemoto nokuthi okukwi-quotation kuyahambisana yini nengozi.

- Uma umshwalense usugculisekile ube usuphasisa ukuthi ukhokheleke bese ulungisa imoto.