Akucaci ngefemu yakwaNissan kuleli
INISSAN Navara yakhiwa efemini yale nkampani ePitoli
Image: Sithunyelwe
Akucaci ngefemu yakwaNissan South Africa eseRosslyn, ePitoli, kulandela isimemezelo sale nkampani emhlabeni jikelele sokuvala ayisikhombisa ngenxa yokubhimba kwezinto.
INissan imemezele ukuthi ilahlekelwe yimali engu-671bn yen (R82 billion) ngonyakamali osongwe ngoMashi 2025.
Ihlela ukwenza izinguquko ezinqala ukubhekana nezinkinga okubalwa kuzo ukunciphisa isibalo sabasebenzi ngo-20 000 kusuka manje kubhekwe ku-2017 kanjalo nokunciphisa amafemu abe ngu-10 esuka ku-17.
Ifemu yasePitoli ikhiqiza iveni iNavara ebese lidayiswa kuleli nakwamanye amazwe ase-Afrika.
Phambilini ibikhiqiza nentandokazi iNP200 ukwenziwa kwayo okugcine ngoMashi nyakenye.
Ngokwezibalo ze-naamsa, ngo-Ephreli iNissan idayise izimoto ezintsha ezingu-794 kuleli kwathi ezingu-353 zadayisa ngaphandle.
Ngenyanga eyandulela leyo ibidayise ezingu- 2 303 kwathi ezingu-1 428 zadayisa ngaphandle kwezwe.
Ngokwe-website yakhona, zintathu izimoto ezidayisa eNingizimu Afrika – yiNavara, Magnite, neX-Trail.
INissan ingenye yezinkampani eziyisikhombisa ezinkulu ezinamafemu kuleli. Ezinye yiToyota South Africa Motors, Ford Motor Company, BMW Group, Isuzu Motors South Africa, Mercedes-Benz neVolkswagen Group Africa.