Uqalile umbukiso iSupertech Torque ePort Shepstone
bmw m Kuningi okuhlelelwe abazothamela iSupertech Torque Motoring Festival eDezzi Raceway ngo-Ephreli 19 no-20
Image: Sithunyelwe
KULINDELEKE ukuthi kudume umsindo wezinkini kunuke nethayi emcimmbini iSupertech Torque Motoring Festival engempelasonto yePhasika phakathi kuka-Ephreli 19 no-20 enkundleni yezimoto iDezzi Raceway ePort Shepstone.
Lo mbukiso kulindeleke ukuthi uhehe ubutsetse bezimoto ikakhulukazi amaBMW M. Ugqugquzelwa yiSupertech Toque okuyiqembu lezimoto leSupertech Group.
Abazowuhambela bazobhema bakholwe ngemibukiso efana nomjaho wezimoto, umbukiso wezinsimbi zakudala nezintsha zakwaBMW M njengeM3, imigilingwane eyenziwa ngabashayeli abanesibindi, ukushaywa kwezidudla okuzobe kwenziwa ngabashayeli okubalwa kubo uDidi Bizarro, Stacy May, Luke Williamson, Cameron Williamson, Kayla Oliphant, Preshu Singh, nabanye.
Abafuna ukuzizwela bazothola ithuba lokuba ngabagibeli bazungeze inkundla nethimba leBMW Driving Experience nokugibela indiza enophephela emhlane.Abanye bazozitika ngobumnandi bomculo, umbukiso wengqephu nemidlalo yamakhompyutha.
Amathikithi okungena aqala kuR200 futhi aseyatholakala kwi-website yeMy Supertech World.