Ongakwenza ukugwema ukugileka ebugebengwini bezimoto

I-MASTER Drive ithe yize izibalo zobugebengu ezithinta izimoto zikhombisa ukwehla kwezinye izindawo kodwa zisaqhubeka nokuba phezulu.

Ithe izibalo zaphakathi kuka-Okthoba noDisemba 2024, zikhombise ukwenyuka ekudunweni kwezimoto zamabhizinisi.

Izibalo ziveze ukuthi;

- Zingu-4 807 izimoto okubikwe ukuthi ziduniwe nokuwukwehla ngo-19.5% uma kuqhathaniswa nesikhathi esifanayo ngonyaka owandulela odlule.

- Kusho ukuthi kudunwa izimoto eziwu-52 ngosuku.

- Zibe wu-7 791 izimoto ezebiwe nokuyisibalo esehle ngo-18.3%

- Ukudunwa kwamaloli kwehle ngo-14%

- Ukweba ezimotweni kwehle ngo-12.9%

- Ukubanjwa inkunzi izimoto ezithutha imali kwehle ngo-17%

- IGauteng, Western Cape neKwaZulu-Natal, yizifundazwe eziphambili ngobugebengu obuthinta izimoto.

- Ukudunwa kwezimoto kube wu-56% wabo bonke ubugebengu ngokweTracker Crime Index.

- Ukweba kube u-44% wabo bonke ubugebengu basezimotoweni ngokweTracker Crime Index.

- Izimoto eziningi zidunwe ngoLwesihlanu phakathi kuka-4 ntambama no-9 ebusuku,

- Ukuntshontshwa kwazo kwenzeke ngoMgqibelo phakathi kuka-4 kuya ku-9 ebusuku.

- Ukujemwa kwezimoto wubugebengu obudlangile ezinxanxatheleni yezitolo ngokweFidelity.

- Ngo-2024, ukuhlaselwa kwabebelandelwa kunyukile ngokweFidelity.

IMasterDrive iphakamise lokhu ukungabi sengcupheni;

- Gwema izindawo ezingakhanyi kahle noma izindawo zokupaka eziseceleni.

- Paka ngo-reverse ukuze ukuphuma endaweni yokupaka kwenzeke ngokushesha futhi ubona kahle phambili.

- Kungakuhle ukupaka ngasodongweni noma eduze konogada.

- Phatha ukhiye ngesandla bese ufaka izimpahla ebhuthini ngale kokulokhu ubavula.

- Buyela ekhaya kungakabi mnyama uma kwenzeka.

- Yiba mehlomane, ubheke okwenzeka eduze kwakho.

- Yima endaweni ekhanyayo futhi ephithizelayo uma usebenzisa amatekisi abala ngebanga olihambile futhi ufihle iselula.

- Bika ubugebengu emaphoyiseni ukusiza ukuqoqa imininingwane ngendlela izigebengu ezisebenza ngayo.

- Bhekisisa isicabha semoto yakho ngaphambi kokuhamba.

- Yima phambi kwesibambo sesicabha uma ukhiya ukuze uvimbe amazama ukukujema.

- Uma ufaka izimpahla ebhuthini, hlala uqaphela abaseduze kwakho nokuthi ubani obukayo.

- Khiyela ama-laptops, izikhwama nezinye izinto ezibalulekile ebhuthini uma uphuma emotweni.

- Thenga isikhwama sikakhiye esivimba izigebengu ukuthi ziwenze iwele.