USam Sam uphucwe kowamanqamu isicoco seRed Bull Shay’iMoto
UBoksie ushaye izidudla waze walenga ngaphandle isiteringi esiphethe ngesandla kwiRed Bull Shay’iMoto eKapa Isithombe: Mpumelelo Macu/Red Bull Content Pool
Kusale kancane asivikele okwesithathu kulandelana isicoco sokuba ngumpetha “ekushayeni imoto” uSamkeliso “Sam Sam” Thubane emncintiswaanneni iRed Bull Shay’iMoto ebiseKapa ngempelasonnto.
USam Sam odabuka eHazyview eMpumalanga, usesinqobe kabili kulandelana lesi sicoco ngo-2021 nango-2022 njengoba nyakenye umncintiswano ubungekho.
Kulo mncintiswano abashayeli bashaya izidudla benze nemigilingwane ehlukene njengokuphuma emotweni ibe ihamba nokunye.
Izethameli ebeziphume ngobuningi bazo, bezivota ngokukhanyisa amalambu ahambisana nomshayeli abasuka bemvotela njengoba abashayeli bengena ngababili ukuncintisana ukuze badlulele emzuliswaneni olandelayo.
Amanye amavoti avela kumajaji obekunguMagesh Ndaba, Vernon ‘Veejaro’ Hendricks, Jeff James noShahiem Bell.
NgoLwesihlanu abashayeli abangu-16 bangenele umzuliswano wokuhlunga nokukhishwe kuwo abayisishiyagalombili abadlulele osukwini lomcimbi ngoMgqibelo.
Kowamanqamu kugcine kusele uSam Sam noChadwin “Boksie” Hadjie wakhona eKapa.
Izethameli zikhethe yena njengompetha kanjalo namajaji.
UBoksie, owaphuma endaweni yesibili ngo-2021, uthe uyajabula ngokunqoba.
“Bengisebenza kanzima kule minyaka edlule, ekugcineni senginqobile,” kusho yena.
Uthe ngomncintiswano babhekane nezingqinamba ezihlanganisa ukunqamuka kwe-steering rack, wheel studs nokunye.