Uqale kabi unyaka kwehla ukuthengwa kwezimoto

Uvulwe kabi unyaka embonini yezimoto eNingizimu Afrika kulandela ukudayiswa kwezimoto isibalo esincane sezimoto ngoJanuwari uma kuqhathaniswa nesikhathi esifanayo nyakenye, ngokusho kwe-Naamsa.

Ikhipha izibalo, i-Naamsa ithe kudayiswe izimoto ezintsha ezingu-41 636 nokuyisibalo esehle ngo-1 658 noma u-3.8% uma kuqhathaniswa no-43 294 owadayiswa ngoJanuwari 2023.

Lokhu kwehla kuqale ezinyangeni ezinhlanu ezedlule zokuphela konyaka uma kuqhathaniswa nesikhathi esifanayo ngo-2022.

Isikhulu se-Naamsa, uMikel Mabasa, sithe ukucinywa kukagesi, inkinga emachwebeni nokunyuka kwezinye zezinto ezithwalisa kanzima imboni.

Izimoto ezadayiswe ngaphandle kwakuleli zibe ngu-20 242. Yisibalo esehle ngo-442 noma u-2.1% uma kuqhathaniswa no-20 684 owaphuma ngoJawarir 2023.

Kuzona zonke izimoto ezingu-41 636 ezidayisiwe, ezilinganiselwa ku-35 108 noma u-84.3% zithengwe emagaraji, u-11.5% uthengwe yizinkampani eziqashisa ngezimoto, u-2.2% kube ngowezinkampani kwathi u-2.0% wathengwa wuhulumeni.

Izimoto ezincane zehle ngo-2 073 zaba ngu-28 790 ekubeni ngoJanuwari nyakenye kwakudayiswe ezingu-30 863.

Kuma-light commercial vehicle, amaveni namatekisi sinyuke ngo-248 isibalo saba ngu-10 871.

Amaloli aphakathi nendawo abe ngu-520 kwathi amaloli amakhulu anyuka ngo-106 aba ngu-1 455 athengiwe.

Izinkampani ezidayise kakhulu yilezi:

Toyota - 10 607

Volkswagen Group SA - 5 490

Suzuki Auto - 5 235

Ford Motor Company - 2 391

Nissan - 2 315

Hyundai Automotive SA - 2 171

Isuzu Motors SA - 1 405

Haval Motors SA- 1 463

Chery Auto SA - 1 425

Renault - 1 411