Ilanga lenyusa amathuba omdlavuza wesikhumba

UKUSHISA kwelanga ngokwedlulele okubonakala kulezi zinsuku, kubeka kubeka abantu engcupheni yokuthola umdlavuza wesikhumba.

Ungoti wesikhumba esibhedlela iNetcare Linksfield, uDkt Ayesha Omar, uthe imisebe yelanga ehlabayo ingalimaza isikhumba sanoma ngubani, akukhathalekile ukuthi uneminyaka emingaki nokuthi uyiluphi uhlanga.

Uthe abantu bakuleli bayathanda ukuhlala ngaphandle bezithokozisa noma besebenza, okubenza ukuthi babe sengcupheni yokuhlaselwa wumdllavuza wesikhumba.

Uthe izinhlobo ezijwayelekile zomdlavuza wesikhumba i-melanoma, i-basal cell ne-squamous cell cancer ezibuye zibizwe nge-non-melanoma. Uqhube wathi imidlavuza enganama-non-melanoma iyelapheka uma isheshe yabonakala.

"Ibala elingafani nesikhumba sakho kumele likukhathaze ufise ukwazi ukuthi ngelani. Udokotela wesikhumba ongakutshela ukuthi lelo bala liyini, ngabe kumele likukhathaze noma cha," kuchaza uDkt Omar.

Inhlangano yezeMpilo emhlabeni, iWorld Health Organisation (WHO), ekuqaleni kwale nyanga ikhiphe umbiko oveza ukuthi abantu abasebenza elangeni basengcupheni enkulu yokuhlaselwa wumdlavuza wesikhumba. Lo mbiko ukhishwe ngokubambisana nenhlangano yomhlaba ebhekelele abasebenzi i-International Labour Organisation (ILO).

Umqondisi weWHO, uDkt Tedros Adhanom Ghebreyesus, kulo mbiko, uthe bangu-1.6 billion abantu abasebenza ngaphandle abatholwa imisebe yelanga ehlabayo ngesikhathi besebenza. Lolu cwaningo lwenziwe i-ILO ngo-2019 lwakhishwa ekuqaleni kwale nyanga.

Uqhube wathi ngo-2019 nje kuphela bangu-19 000 abantu ababulawe umdlavuza wama-cells esikhumba, eyaziwa ngenon-melanoma, ebebesebenza ngaphandle, u65% wabo ngabantu besilisa.

"Ukusebenza elangeni ungazivikelile kungaholela ekutheni ufe. Zikhona izindlela zokuvikela isikhumba emisebeni yelanga eyingozi okumele abasebenzi nabaqashi bayilandele ukuze kwehle isibalo sabahlaselwa ilo mdlavuza,” kusho uGhebreyesus.

UDkt Omar uthe kubalulekile ukuthi uvakashele udokotela wesikhumba uma ubona ibala elibonakala limnyama kunesikhumba sakho noma elingafani namanye onawo elizivelele esikhumbeni. Uma unebala elime ngendlela ehlukile kunamanye onawo, uma unebala eliwumugqa ongalazi ukuthi lidalwe yini noma unamabala amaningi avele esikhumbeni sakho noma imbotshana engajwayelekile. Uma imbotshana osekunesikhathi unayo uyibona imfimfa uketshezi.

"Yize umdlavuza ungahlasela noma ngubani, bakhona abantu abasengcupheni njengabantu abawuthola ngokofuzo, abantu abanebala elikhanyayo basengozini ngenxa yokuthi i-melanin esikhunjeni sabo incane, abantu ababhemayo, abantu abaphathwa izifo ezenza amasosha abe ntekenteke, abantu abadlala imidlalo edlalwa ngaphandle edonsa isikhathi eside efana nekhilikithi, igalofu neminye," kuchaza uDkt Omar.

Uqhube wathi ongakwenza ukuze uzivikele emisebenzini yelanga ukugwema ukuba ngaphandle kwasendlini phakathi kuka-10 ekuseni kuya ku-3 ntambama.

"Uma kunamafu esibhakabhakeni akuchazi ukuthi imisebe yelanga ayihlabi esikhumbeni," kusho uDkt Omar.

Ukugcoba ukhilimu okuvikela elangeni, i-suncreen noma i-sunblock ene-Sun Pprotection Factor (SPF) 30 nezigcobo ozisebenzisayo. Uma ubhukuda phinde uyigcobe njalo ngemuva kwamahora amabili.

“Zama ukugqoka izingubo ezimboza umzimba ungaveli elangeni ukuze lingezukukushisa bukhoma ngokunjalo zingasali nezibuko zelanga.”