Ukugcwaneka namancoko ngezigigaba zaselokishini
ISIHLOKO SENCWADI: W, is for Witness
UMBHALI: Karen Lazar
ABASHICILELI: Quartz Press
UMHLAZIYI: Mpume Nzimande
ITHOLAKALA: Exclusive Books, www.jdoubledpublicity.co.za
KUGQAMA ukugcwaneka kukabasi encwadini eyinoveli ethi W, is for the Witness, ebhalwe nguKaren Lazar, eqhakambisa inhlalo yabantu.
Udaba luqala ngesikhathi kunezinxushunxushu eKrugersdorp, lapho ubasi eswela umgodi wokucasha bese esizwa nguJuly, insizwa endala esebenza engadini. Kushuba isimo uma ubasi esekhohliwe ukuthi ucashile emzini wenye indoda futhi kumele ayihloniphe yize isebenzela yena.
Kubhimba kakhulu emakhosikazini abo ngoba uMaureen, ukhohlwa yindawo yakhe uma esefuna uKefilwe, unkosikazi kaJuly, ambize ngoMedemu ekubeni esemzini wakhe. Kanti usezithintele kusisi Kefilwe.
Umtshela angananazi ukuthi umfazi, nomfazi unezandla zokuzibilisela amanzi futhi ayikho igiza nobhavu omkhulu wokugeza kwantuthu. Okumvomva inkani uMaureen wukuthi kunethoyilethi lomgodi egcekeni!
Mfundi, uzokitazeka uze uyiqede ukuyifunda inoveli. Inothiswe ngezaga, izenzasamuntu nezingathekiso. Kukhona nenkankane elixoxa zonke izindaba zelokishi. Ligxeka nendlela abantu abalizonda ngayo nokunye okuningi.
ABAKWAJACANA Media, batomula le noveli njengenye ehamba phambili emcintiswaneni wezindondo. Inoveli inamancoko kepha ilandisa ngezigigaba ezijwayele ukwenzeka emalokishini.
I-White Chalk, yiqoqo lezindaba ezimfushane ezixube izigameko zempilo yaselokishini nokuhlalisana kwemindeni kanti ibhalwe nguTerry-Ann Adams. Ixube izindaba ezixwayisa imiphakathi ngokubandlululwa kwabantu bebala elimhlophe, okwenzeka ngisho emindenini. Ibhalwe ngolimi oluqondile kepha ixuba nesitsotsi esihlanganise nesibhunu. Kujwayelekile eMzansi ukuthi abantu baxube izilimi nesitsotsi uma bekhuluma.
Phakathi kwezindatshana kunodaba luka-Anti Mabel, uMaMgobhozi wendawo. Uhluleka ukuchazela umseshi ngempi yasemgwaqweni. Ukhuluma anxanxathe uMabel, abalise ngendodana yakhe uTyrone emqedela inyama. Akhononde ngamagwinya abiza uR15.
Konke lokhu ukulandisa ngenkathi kufuneka ubufakazi ngesigameko asibonile. Ngineqiniso ukhona u-Anti Mabel omaziyo, ozikhininda zonke izindaba zaselokishini.
Zikhona ezinye izincwadi ongazifunda kwi-www.jacanamedia.co.za