I-Port Edward igabe ngendawo ekwazisa konke ngekhofi
INGAPHANDLE lendawo evubela ikhofi nefundisa ngalo i-Beaver Creek Coffee Farm esePort Edward, oGwini oluseNingizimu yeKwaZulu-Natal
Image: SIMANGALISO NTSHANGASE
NGESONTO elidlule ngithole ingqayizivele yethuba ngamenywa wuphiko olubhekele ezokuvakasha oGwini oluseNingizimu yesifundazwe iSouth Coast Tourism & Investment Enterprise, sabe sesiyiswa kwenye indawo yzezokuvakasha esePort Edward, ogwini lweKwaZulu-Natal iBeaver Creek Coffee Farm, ezakhele udumo ngokuvubela izinhlobonhlobo zekhofi, futhi ifundise okuningi ngalokho.
Engifike ngakuqaphela futhi ngakuthanda ngale ndawo esineminyaka ewu-41 wukuthi ivulekile futhi ishaya ngodedangendlale womhlaba, okuthi uma usufikile kuyona uthole ithuba lokuqonda kabanzi ngomlando wokwakheka nokusunguleka kwekhofi, ubumqoka balo nokuthi imakethe yalo injani.
UFUNDISWA nokuthi ikhofi litshalwa kanjani uma uvakashele eBeaver Creek Coffee Farm, indawo yezokuvakasha esePort Edward, oGwini oluseNingizimu yeKwaZulu-Natal
Image: SIMANGALISO NTSHANGASE
Uma usungaphakathi e-Beaver Creek Coffee Farm ukwazi ukubona ubunjalo bembewu yekhofi, kuqhubekele ekutheni uma usuvuna izinhlamvu zalo uqhubeka kanjani nomsebenzi olandela lapho wokulivubela, kube wukuthi selisesimeni esihle sokulithaka bese ulidayisele abalithandayo.
IZINHLAMVU zekhofi elivutshelwa e-Beaver Creek Coffee Farm, indawo yezokuvakasha esePort Edward, eNingizimu yeKwaZulu-Natal
Image: SIMANGALISO NTSHANGASE
Engxoxweni nomphathi wale ndawo uMnuz Dix Foster, kuhlaluke ukuthi ikhofi limqoka kangakanani emnothweni wezwe nasemazweni ehlukene, ikakhulu awase-Afrika ngoba yilapho livutshelwa kakhulu khona.
UFoster uchaze le ndawo ngokuthi ikwezihamba phambili ngezinga lomkhiqizo wekhofi emhlabeni jikelele, futhi wakubeka ngokusobala nangokucacile ukuthi iwusizo kangakanani ebantwini abathanda ukuliphuza, abafisa ukwazi kabanzi ngalo nalabo abanentshisekelo yokuhweba ngalo.
UMKHIQIZO wekhofi odayiswa eBeaver Creek Coffee Farm, indawo yezokuvakasha esePort Edward, oGwini oluseNingizimu yeKwaZulu-Natal
Image: SIMANGALISO NTSHANGASE
“Uma usukule ndawo uthola isithombe esicacile sobumqoka bale mboni emnothweni wezwe lethu, nokuthi kungani ikwezihamba phambili kwezomnotho nokuhwebelana, futhi kuthi uma usuqede ukusivakashela uhambe usukuqonda cishe ngokupholele ukuthi umkhiqizo wekhofi waqala kanjani e-Ethiopia ngeminyaka yawo-1950, kuze kube kufinyelela kowesibili wona owaqalwa eCongo ngeminyaka yawo-1970, njengoba sekulapho esikhona manje lapho ikhofi seligcwele umhlaba wonke,” kusho yena.
UMKHIQIZO owehlukene wekhofi owenziwa eBeaver Creek Coffee Farm, indawo yezokuvakasha esePort Edward, oGwini oluseNingizimu yeKwaZulu-Natal
Image: SIMANGALISO NTSHANGASE
Le ndawo inabasebenzi abawu-30 abaqashwe ngokugcwele ukuqhuba umsebenzi wakhona wansuku zonke, kanti futhi ngokusho kwaFoster - ikwesezizicabele indlela kwezomnotho emhlabeni jikelele njengoba kuvele nokuthi yamukela izivakashi ezingaphezu kuka-100 000 zamazwe omhlaba njalo ngonyaka ikakhulu ngalesi sikhathi samaholidi kaKhisimusi noaNcibijane.
UFUNDISWA nokuthi ikhofi litshalwa kanjani uma uvakashele eBeaver Creek Coffee Farm, indawo yezokuvakasha esePort Edward, ogwini oluseningizimu yeKwaZulu-Natal
Image: SIMANGALISO NTSHANGASE
Angisiye umuntu wekhofi, kodwa kulesi sikhashana esincane engibe kule ndawo ngaso - nami ngihamba emazwini kaFoster ukuthi kuningi okuhle umuntu angakufunda futhi akuqonde kangcono ngale mboni uma evakashela kule ndawo, mhlawumbe nakwezinye ezigabe ngolwazi olunjena ngekhofi nokunye okuningi okweyamene nalo.
IMISHINI yokuvubela ikhofi yaseBeaver Creek Coffee Farm, indawo yezokuvakasha esePort Edward, oGwini oluseNingizimu yeKwaZulu-Natal
Image: SIMANGALISO NTSHANGASE