Babheme bakholwa kowamaciko eNewcastle
BABHEME bakholwa eNewcastle kuqhakanjiswa ubuciko obahlukene emcimbini wezinsuku ezimbili obusenkundleni yezemidlalo eMajuba College isithombe: KZNDSAC/FACEBOOK
BAPHUME ngobuningi babo abantu baseNewcastle namaphethelo bezothamela umcimbi oqhakambisa ubuciko obuhlukene.
Lo mcimbi obizwa ngeKwaZulu-Natal Department of Sport Arts and Culture Multi Genre Music Festival uthathe izinsuku ezimbili ububanjelwe enkundleni yezemidlalo eMajuba College eMadadeni.
Osomabhizinisi abahlukene abenza ubuciko bezandla okubalwa kubo abasiki benqephu, abenza ubuhlalu nezitsha bahlanganyele ndawonye emathendeni abe khona bekhangisa imisebenzi yabo emihle.
Ngale kokukhangiswa komsebenzi wezandla, abaculi abadumile esifundazweni bebeshiyelana inkundla nosonkondlo kujatshuliswa izinkumbi zabantu ebezihambele umcimbi. NgoMgqibelo uhlelo lomculo belugxile kumaskandi, Afropop neRnB kanti ngeSonto bekupholile kunandisa abomculo wokholo neJazz.
