KUSHUBILE ebandleni lakwaShembe, ohlangothini lwaseBuhleni, njengoba kuphambene imibono kumaNazaretha aseqoqweni lakwiFacebook olubizwa Ikhenana Lamanazaretha AseBuhleni.
Umsindo uqubuke ngokuthi oyi-admin yaleli khasi enxuse ukuba kuvotelwe umculi kamaskandi waseMzumbe, uMalibongwe “Mjolisi” Gwala, ngenxa yokuthi uyiNhlalisuthi yaleli bandla.
Yize abanye behambisana nalo mbono kodwa abanye bashaye phansi ngonyawo. U-admin uthe into eyenza asukumele ukuvotelwa kukaMjolisi ukuthi akakwazi ukweswela abaseki ekubeni eyiNazaretha laseBuhleni.
“Ngcono naye athole izinombolo ezizokhombisa ukuti akayedwa.” Omunye umNazaretha uthe useyomxolela umholi waleli bandla, iNkosi uMduduzi “Unyazi LweZulu” Shembe ngoba yena uzovotela ingoma kaMthandeni SK ethi Gucci.
UVincent Sphah Vengwa uthe umuntu akavotele ingoma ayithandayo ngoba akuhlangene nenkolo. UNkululeko Buthelezi uthe yena akulona icala ukweseka umuntu entweni aziphilisa ngayo ngoba isiphiwo sakhe asiphiwa wuNkulunkulu.
“Kuhle futhi kuNkulunkulu uma amaNazaretha esekana entweni enhle,” kusho uNkululeko.
UFisokuhle Mndebele uthe nje yena uvotela Ingoma C (okuyi-code kaMthandeni). UMgabadeli Dladla uthe ukube uMengameli weNkatha, uMnuz Velenkosini Hlabisa, wakhankaselwa njengoba kwenzeka kuMjolisi ngabe kungcono.
“Nale nsizwa eyimbongi ebikumaSatma anizange niyikhankasele. Onjani lona osekhankaselwa kanjena?” kusho uMgabadeli.
USitha Sedollar Ileza uthe Unyazi bayaluthanda kodwa bekungakuhle ukube uMjolisi ucelile ukuthi akhankaselwe.
“Manje lutho. Ezinye izinto kwamele zibhekwe mehlo mane. Izinhlangano namasonto akumele bephawule noma batshengise ukuchema ezindabeni ezinjena ngoba abaculi abanye bayacula ngoNyazi. Ukube uMthandeni le ngoma ibikhuluma ngoBaba uShembe ngabe wenze kanjani ngoba uMjolisi nikhonza naye?”
UMpumza MaSibalikhulu uthe yena uzovotela ingoma kaMjolisi enguNgoma G ngemali yakhe ayiphiwe wuShembe futhi akakhathaleli ukuthi omunye umuntu uthini.
"Umuntu uyohlezi ebona isici kuShembe ngoba uthe masithandane sibe yimbumba. (Ngakho) uyobe ungoni uma weseka uMjolisi (kodwa) uyobe uthuthukisa mntakaBhombela,“ kusho uMpumza.
Okhulumela ibandla laseBuhleni, uMnuz Thokozani Mncwabe, uthe yize kungaphoqwa muntu ukuba avotele muphi umculi ”kodwa akuve kumnandi ukuqala ushanele ekhaya, bese ukushanela ngaphandle ngoba uzohlekwa ngabantu," kucikoza uMncwabe.
UTusokwakhe Bhekani uthe ukube abantu bavotela uMjolisi bangalifaki isonto, bekuyoba uswidi. UMjolisi wodumo lukaBaba Ka-Enzo noDear Nkulunkulu, uqhathwe noThokozani Langa, Malini, Woodblock DJs, Allen, Malungelo, Blaq Major, Andile KaMajola noZinhle Kwaaiman.
