UVUKWA wumunyu umculo wokholo owaduma uTebello Sukwene, uma ecabanga ngendodakazi yakhe acishe wakhipha isisu eyikhulelwe.
Embhalweni wakhe kwiFacebook, uTebello udalule ukuthi kwakufanele akhethe phakathi kokuphila nokulahlekelwa yingane esakhulelwe. Uthe odokotela babemphoqa ukuba ahushule isisu ngoba babezitshela ukuthi umntwana wakhe u-Amahle, ngeke aphile.
“(Njengomndeni) sanquma ukumethemba uJehova futhi ngokwenza njalo ngabeletha ingane yentombazane ephile saka futhi eyazalwa ngosuku nami engalethwa ngalo emhlabeni. Sasho sathi Mahle-Amandla KaThixo."
Umculi wokholo owaduma kwiJoyous Celebration, wacula ngokuhlanganyela noBenjamin Dube, uLira noSimphiwe Dana, uthi kwakungaqali ukuthi ezwe ubuhlungu ngengane yakhe. UTebello ubonge uMdali ngokuwa evuka naye, nokuhlenga izingane zakhe noma zihlangabezana nezingqinamba.
"Ngicabanga indodana yethu uPablo okwatholakala ukuthi une-ADD (Attention deficit disorder), odokotela bathi akaqale amaphilisi kodwa samyekisa emuva kwenyanga ngoba engamphathi kahle. Impilo yakhe sayibeka kuMdali. Kulo nyaka wenza u-matric."
Uthi enye indodana yakhe uSiya, ayenzanga kahle esikoleni ngesikhathi isaqala unyaka owedlule kodwa iphumelelile, kumanje ifunda uGrade 9.
Wadalula nokuthi uke waswela imali yokukhokhela ingane yakhe uYonela, esikoleni kodwa wagcina ephumelele njengoba esezokwenza uGrade R.
"Uyaphila uMdali, " kudumisa uTebello, oshade nomfowabo womculi uMusa Sukwene, wodumo kuma-Idols SA.