INTAKA ibekelwe amazolo kwiGcwalisa Spring Picnic All White, eKing's Park, eThekwini ngoMgqibelo kusukela ngo-12 emini.
Izethameli, ezizobe ziswenke ngombala omhlophe, zizobe zizitika ngomculo onhlobonhlobo futhi ozobe uculwa bukhoma ngabaculi abahlukahlukene. Umaskandi uzobe umelwe nguKhuzani, Igcokama Elisha, Mzukulu, Imfezemnyama, Dlubheke, Inkosi Yamagcokama, Ntencane, Dumakahle, Cevuzile, Njoko, Mdumazi, Navigator, Gatsheni, DSD, Mroza, Jaiva Zimnike, Izingane Zoma, Imithente noDr Buselaphi.
Umsunguli walo mcimbi, uKhuzani Mpungose, uthe izihlwele zizobe zisheba umculo nomdlalo webhola njengoba uzobe ukhonjiswa kuma-screen womqhudelwano weMTN8 Final phakathi kwe-Orlando Pirates naMaZulu. Uthe lo mcimbi usho lukhulu kuye njengoba usho ukukhula nokudlondlobala kwegama lakhe.
"Abaculi bakamaskandi bazothola ithuba lokwabelana ngesteji nabaculi bezinye izinhlobo zomculo futhi kungenzeka kugcine sekunezingoma eziculwa ngokuhlanganyelwa," kuphawula uKhuzani.
UKhangelani "DSD" Mhlongo, woSaziwayo, uthe igcagcele esokeni kubalandeli bakhe ngoba vele baswenka ngombala omhlophe.
Umsakazi woKhozi FM, uZimiphi "Zimdollar" Biyela, uthe abantu abafike ngobuningi khona bezozibonela ngawabo eveze isibhono. "Ngizobe ngiphethe uhlelo noSomizi Mhlongo. Sihamba noTshatha," kuchaza uZimdollar. UDJ Tira uthe yena uzofika eseshaya kancane ngoba yizinto zakhe umswenko. "Nohlu lwabaculi luyahlanya. Ngikhuluma ngoBig Zulu, AKA, Cassper Nyovest, Nomfundo Moh noKamo Mphela. Wena hamba uyothenga ithikithi eTicketpro. Uzosithola khona."
UNgqongqoshe wezeMpilo KwaZulu-Natal, uNomagugu Simelane, uthe imicimbi efuze lena ibalulekile futhi iyadinga ukwesekwa ngoba iqhakambisa isifundazwe.
IHip Hop izobe imelwe nguCassper, Big Zulu no-AKA. I-house music izobe ibophele uDlala Thukzin, DJ Zaizo noDJ Tira. USjava noNomfundo Moh bazobe bemele umculo we-Afro soul. Abazifela ngomculo wama-piano bazodansa baze bashone phansi ngoba uzobe ekhona uBoohle noKamo Mphela. Nabathandi bomculo wokholo ngeke basale ngaphandle njengoba kukhona uDumi Mkokstad noJumbo.