EMUVA kweminyaka iBoom Shaka inyamalele emculweni, izobonakala okokuqala kumaMetro FM Music Awards eMbombela Stadium, esifundazweni saseMpumalanga namhlanje. Leli qembu lizobe ligubha iminyaka engu-30 njengoba lakhipha i-albhamu yalo yokuqala eyayisihloko esithi Kwerekwere ngo-1994.
IBoom Shaka yazakhela udumo ngenoni elithi It's About Time nelithi Gcwala, futhi yasungulwa wuLebo Mathosa, uThembi Seete, Junior Sokhela noTheo Nhlengethwa. ULebo washona ngo-Okthoba 23, 2006 engozini yemoto e-East Rand, eGauteng.
KumaMetro FM Music Awards, iBoom Shaka izoshiyelana inkundla noDJ Oskido, Oscar Mbo, Dlala Thukzin, Makhadzi, Lwah Ndlunkulu, Mthunzi, Lamiez Holworthy, Aymos, Mellow and Sleazy, Naked DJ, Shisaboy nabanye.
Kusasa izithameli zizozitika ngamanoni apholile angasoze abuna kwiBlack To The Future: Love Movement ezobe iseLowveld National Botanical Gardens eMbombela kusukela ngo-12 emini.
Kuzobe kunandisa uWilson B Nkosi, Paul Mtirara, Lulo Cafe, Msizi Shembe, Sentle Lehoko, Sjava, Babalwa M, Mthunzi, Lwah Ndlunkulu noShlabani. Kuyo yonke lemicimbi uhlelo luzobe luphethwe wuSomizi Mhlongo futhi kungenwa ngethikithi elilodwa.
Emacikweni aqokwe kakhulu kumaMetro FM Music Awards kubalwa uTyla oseminxeni eyisithupha, uKabza De Small noTyler ICU abaseminxeni emihlanu neNkabi Zezwe eminxen emine.
Abanye abaqokiwe ngoNtokozo Mbambo, Jumbo, Hle, Mbuso Khoza, Amandla Freedom Ensemble, Sbusiso Mash Mashiloane, Dlala Thukzin, Lwah Ndlunkulu, Kamo Mphela, Nontokozo Mkhize, Thee Legacy, Zakes Bantwini, DJ Kotin, DJ Lag, Sykes, Nasty C, Nomfundo Moh, Khuli Chana, Cassper Nyovest, Zonke, DBN Gogo, Makhadzi nabanye.